مارچ میں سردی کی واپسی! اگلے 3 دن کیلئے الرٹ جاری‘ فصلوں کی کٹائی موخر کرنے کا مشورہ
نئی دہلی: ملک کی کئی ریاستوں میں غیر موسمی بارش سے موسم میں بڑی تبدیلی دیکھی جارہی ہے ۔ دہلی، اتر پردیش، ہریانہ، گجرات، راجستھان سمیت شمالی ہندوستان کی بیشتر ریاستوں میں ویک اینڈ پر موسم نے کروٹ لی ہے۔ کہیں بوندا باندی تو کہیں ژالہ باری کے ساتھ ہلکی سے درمیانی بارش اور ٹھنڈی ہوائیں چل رہی ہیں، جس کی وجہ سے موسم ایک بار پھر سرد ہونے لگا ہے۔ محکمہ موسمیات (آئی ایم ڈی) نے امید ظاہر کی ہے کہ بارش کی سرگرمیاں جاری رہیں گی۔آئی ایم ڈی کے مطابق، اگلے 3 دنوں تک دہلی۔این سی آر اور اتر پردیش کے کئی اضلاع میں گرج چمک کے ساتھ بارش ہونے کی توقع ہے۔ جس کی وجہ سے آئندہ دو سے تین دنوں تک درجہ حرارت میں کمی ریکارڈ کی جائے گی۔ خیال رہے کہ بارشوں کی کمی کے باعث فروری میں ہی درجہ حرارت میں اضافے کے ساتھ مارچ جیسی گرمی محسوس کی گئی تھی، جبکہ اب مارچ میں ایک بار پھر گلابی سردی لوٹ آئی ہے۔آئی ایم ڈی کے مطابق آج زیادہ سے زیادہ درجہ حرارت 27 اور کم سے کم درجہ حرارت 17 ڈگری کے آس پاس رہنے کا امکان ہے۔ اس کے ساتھ ہی اگلے تین دہلی-این سی آر میں بارش کا امکان ہے۔ 21 مارچ کے بعد موسم پھر صاف ہو جائے گا اور زیادہ سے زیادہ درجہ حرارت میں معمولی اضافہ ریکارڈ کیا جائے گا۔ 22 سے 24 مارچ کے درمیان زیادہ سے زیادہ درجہ حرارت 30 سے 31 ڈگری اور کم سے کم درجہ حرارت 15 سے 17 ڈگری تک رہ سکتا ہے۔موسم کی پیشن گوئی کرنے والی ایجنسی اسکائی میٹ کے مطابق اتوار کو کئی حصوں میں گرج چمک کے ساتھ ہلکی بارش، آسمانی بجلی اور تیز ہواؤں کا امکان ظاہر کیا گیا ہے۔ ہفتہ کو بارش اور ٹھنڈی ہواؤں کے باعث موسم کچھ اس طرح بدلا کہ لوگ سویٹر پہنے نظر آئے۔ موسم کی پیشن گوئی کرنے والی ایجنسی اسکائی میٹ کے مطابق، ویسٹرن ڈسٹربنس کو مغربی ہمالیہ کے اوپر ایک گرت کے طور پر دیکھا جا سکتا ہے۔ جس کی وجہ سے مغربی ہمالیائی خطہ اور پنجاب، ہریانہ، چندی گڑھ، دہلی، اتر پردیش اور راجستھان میں 21 مارچ تک تیز ہواؤں کے ساتھ ہلکی سے درمیانی بارش کا امکان ہے۔اس کے ساتھ ہی ہماچل پردیش اور اتراکھنڈ کے کچھ حصوں میں ژالہ باری کا بھی امکان ہے۔ شمالی چھتیس گڑھ، اڈیشہ، بہار، جھارکھنڈ، مغربی بنگال اور شمال مشرقی ہندوستان کے کچھ حصوں میں ہلکی سے درمیانی بارش اور تیز ہواؤں کے ساتھ گرج چمک کے ساتھ بارش ہوسکتی ہے۔ جبکہ تمل ناڈو، آندھرا پردیش اور اندرونی کرناٹک میں ہلکی سے درمیانی بارش اور گرج چمک کے ساتھ بارش ہوسکتی ہے۔