حیدرآباد۔19 اکتوبر (یواین آئی) تلنگانہ کے حلقہ اسمبلی منوگوڑو کے ضمنی انتخاب کے سلسلہ میں انتخابی مہم میں حصہ لینے والے بی جے پی کے امیدوار راج گوپال ریڈی کی تقریر کے دوران کانگریس اور بی جے پی کے کارکنوں میں تصادم کا واقعہ پیش آیاجس سے کچھ دیر کیلئے کشیدگی پھیل گئی۔کانگریس کے کارکنوں نے گٹ اوپل منڈل کے انتم پیٹ علاقہ میں راج گوپال ریڈی کی تقریر کے دوران مداخلت کی اور ان سے دریافت کیا کہ وہ کس منہ سے اس علاقہ میں آئے ہیں۔اس دوران وہاں موجود بی جے پی کارکنوں نے اس پر اعتراض کیا اور دونوں جماعتوں کے کارکنوں کی بحث وتکرار نے تصادم کی شکل اختیارکرلی۔واضح رہے کہ منوگوڑو کے کانگریسی رکن اسمبلی راج گوپال ریڈی نے اس حلقہ سے استعفی دے دیا اور بی جے پی میں شمولیت اختیارکرلی۔ان کے استعفی کے سبب اس حلقہ کا ضمنی انتخاب ہورہا ہے ۔بی جے پی نے راج گوپال ریڈی کو امید وار بنایا ہے ۔
