کانگریس قائد کا دورہ راجستھان ، 132 کروڑ روپے لاگتی پُل کا سنگ بنیاد
جئے پور:اْدے پور میں کانگریس چنتن شیویر کے بعد کانگریس کے سابق صدر راہل گاندھی آج راجستھان کے ڈونگر پور پہنچے، جہاں انہوں نے بنیشور دھام پہنچ کر پوجا ارچنا کی۔ اس کے بعد راہول گاندھی اور چیف منسٹراشوک گہلوت نے بینشور دھام میں 132 کروڑ روپے کی لاگت سے بنائے جانے والے پْل کا سنگ بنیاد رکھا۔ ساتھ ہی راہول گاندھی نے بانسواڑہ سرحدی علاقے میں ایک جلسہ عام سے خطاب کیا۔ راہل گاندھی نے سب سے پہلے بدھ پورنیما کی مبارکباد دی۔راہول گاندھی نے ملک کے موجودہ حالات کا تذکرہ کیا اور کہاکہ بی جے پی حکومت نے معیشت پر حملہ کیا ہے۔ وزیر اعظم مودی نے نوٹ بندی کی، غلط جی ایس ٹی نافذ کیا۔ جس نے ہماری معیشت کو تباہ کیا۔ آج ملک میں نوجوانوں کو روزگار نہیں مل سکتا۔ راہل گاندھی نے کہا کہ مودی حکومت نے کسانوں کے خلاف کالے قانون لائی ہے۔ اس قانون سے صرف 2تا3 تاجروں کو فائدہ ہوگا۔راہل گاندھی نے کہا کہ بی جے پی دو ہندوستان بنانا چاہتی ہے۔ ایک صنعتکاروں کا اور دوسرا غریبوں، دلتوں اور پسماندوں کا۔ راہل گاندھی نے کہا کہ ہمیں دو ہندوستان نہیں چاہئے، ہم ایک ہندوستان چاہتے ہیں۔ ہندوستان میں ہر شخص کو اپنے خوابوں کو پورا کرنے کا موقع ملنا چاہیے۔ راہل گاندھی نے کہا کہ یہی ہماری لڑائی ہے۔ گہلوت حکومت عوام کی بھلائی کے لیے کام کرتی ہے، لیکن بی جے پی حکومت والی ریاستوں میں امیروں کے لیے کام ہوتا ہے، تاجروں کے لیے کام ہوتا ہے۔ تعلیم اور صحت کی بات ہی نہیں ہوتی۔ راہل گاندھی نے کہا کہ آج بنیشور دھام میں پوجا اور اس پْل کا سنگ بنیاد رکھ کر انہیں خوشی ہوئی ہے۔ راہل گاندھی نے کہا کہ جب بھی یہاں میلہ لگے گا تو میں بھی آپ کے ساتھ یہاں پہنچوں گا اور درشن کروں گا۔ میں بھی قبائلیوں کے اس عظیم کمبھ کا گواہ بننا چاہتا ہوں۔راہل گاندھی نے کہا کہ کانگریس اور قبائلیوں کا گہرا رشتہ ہے۔ آپ کی جو تاریخ ہے ہم اس کی حفاظت کرتے ہیں۔ ہم آپ کی تاریخ کو مٹانا نہیں چاہتے۔ جب یو پی اے حکومت تھی تو ہم قبائلیوں کے لیے زمین، جنگل اور پانی کے تحفظ کے لیے قانون لائے تھے۔ حصول اراضی بل جیسے قوانین کے ذریعے آپ کی دولت کی حفاظت کی اور اس سے قبائلیوں کو فائدہ پہنچایا۔ راہل گاندھی نے کہا کہ ہندوستان میں دو نظریات کی لڑائی ہے۔ ایک طرف کانگریس سب کی حفاظت کرتی ہے تو دوسری طرف بی جے پی ہے جو قبائلیوں کو دبانے اور ختم کرنے کا کام کرتی ہے۔
