ممبئی:گزشتہ چند ہفتوں میں اپوزیشن کے شور شرابے کے بعد مہاراشٹر حکومت نے منگل کو 40 تعلقہ جات میں خشک سالی کا اعلان کرنے کا فیصلہ کیا جہاں خریف سیزن کے پہلے مرحلے میں کم بارشیں ریکارڈ کی گئیں۔ اس کے ساتھ مرکز سے درخواست کی جائے گی کہ وہ ان 40 تعلقہ جات میں خشک سالی کی صورتحال میں فوری مدد فراہم کرے، جیسا کہ وزیر اعلیٰ ایکناتھ شنڈے کی صدارت میں ریاستی کابینہ کے فیصلے کے مطابق یہ فیصلہ لیا گیا ہے۔ وزیر اعلیٰ اور نائب وزیر اعلیٰ دیویندر فڈ نویس نے یہ بھی ہدایت دی کہ راحت اور بازآبادکاری کے وزیر کی سربراہی میں کابینہ کی ذیلی کمیٹی کو ریاست کے دیگر اضلاع میں خشک سالی جیسی صورتحال کا اعلان کرنے کے لیے ترجیحی بنیادوں پر فیصلہ کرنا چاہیے اورکم بارشوں کے لیے امداد فراہم کرنا چاہیے۔ وہاں مناسب امدادی اقدامات کئے جائیں گے۔ ریلیف اینڈ ری ہیبلیٹیشن ڈیپارٹمنٹ نے خشک سالی کے اعلان کی صورتحال سے بھی آگاہ کیا جس میں خشک سالی کے انتظام کوڈ 2016 کی دفعات کو مدنظر رکھتے ہوئے فصلوں کے پانی کی صورتحال کا جائزہ لیا گیا۔ اپوزیشن مہا وکاس اگھاڑی کے ایک وفد نے پیرکوگورنر رمیش بیس سے ملاقات کی تھی اور ریاست کے بڑے حصوں کو درپیش خشک سالی جیسی صورتحال سمیت مختلف مسائل کی فہرست پیش کرتے ہوئے ایک میمورنڈم پیش کیا تھا جس کی وجہ سے کھیتوں میں پریشانی کا سامنا کرنا پڑا تھا۔ اس سال ریاست میں کل سالانہ اوسط کے 13.4 فیصد بارش کی کمی تھی اور اب ربیع سیزن کی بوائی بتدریج شروع ہوگئی ہے، محکمہ زراعت کے مطابق اب تک تقریباً 12 فیصد کام مکمل ہو چکا ہے۔ ایک اور اہم فیصلے میں ریاست اب قدرتی آفات کے متاثرین کو ریاستی ڈیزاسٹر رسپانس فنڈ کے معیارکے تحت موجودہ دو ہیکٹر سے بڑھ کر تین ہیکٹر کی حد تک امداد فراہم کرے گی۔
