کراچی ۔4 فروری (سیاست ڈاٹ کام ) پاکستان کرکٹ ٹیم کے نوجوان فاسٹ بولر شاہین شاہ آفریدی نے انکشاف کیا ہے کہ نسیم شاہ اور ان کے درمیان زیادہ سے زیادہ وکٹیں حاصل کرنے کے لیے ایک مثبت رقابت رہتی ہے جو ٹیم اور بولر دونوں کی کارکردگی میں بہتری لانے کے لیے اہمیت کی حامل ہے۔ شاہین آفریدی نے کہا ہے کہ اگر وہ میچ میں زیادہ وکٹیں لیتے ہیں تو نسیم شاہ بھی چاہتے ہیں وہ بھی وکٹیں لیں، سری لنکا کے خلاف کراچی ٹسٹ میں ایسا ہی ہوا پہلی اننگز میں انہوں نے اور دوسری اننگز میں نسیم شاہ نے پانچ کھلاڑیوں کو آوٹ کیا۔19 سالہ فاسٹ بولر نے انکشاف کیا ہے کہ سری لنکا کے خلاف کراچی ٹسٹ میچ کی پہلی اننگز میں انہوں نے 5 وکٹیں حاصل کیں تو نسیم شاہ مایوس ہوگئے، انہوں نے کہا کہ نسیم شاہ کو میچ کی دوسری اننگز میں 5 وکٹیں لے کر ہی تسلی ہوئی۔ شاہین شاہ آفریدی نے کہا کہ راولپنڈی کے عوام ہمیشہ پرجوش ہوتے ہیں ، یہاں آخری ٹسٹ میچ کے دوران تماشائیوں کا شور اتنا زیادہ تھا کہ لگا ٹی ٹوئنٹی میچ کھیل رہے ہیں۔ آفریدی نے کہا کہ سری لنکا کے خلاف 5 وکٹیں حاصل کرنا ان کے ٹسٹ کیرئیر کا یادگار لمحہ تھااور وہ بنگلہ دیش کے خلاف بھی عمدہ کارکردگی دکھانے کی کوشش کریں گے۔شاہین شاہ آفریدی اب تک 7 ٹسٹ میچوں میں پاکستان کرکٹ ٹیم کی نمائندگی کرچکے ہیں، جن میں 29.88 کی اوسط سے مجموعی طور پر 25 وکٹیں حاصل کی ہیں۔ ٹسٹ میچ کی کسی ایک اننگز میں اْن کی بہتری بولنگ 77رنز کے عوض 5 وکٹ ہے، جبکہ کسی بھی ٹسٹ میں اْن کی بہترین بولنگ 128رنز دے کر 6 وکٹیں ہیں۔
