واشنگٹن11 اپریل (یو این آئی) امریکہ کے صدر ڈونالڈ ٹرمپ نے ملکی میڈیا پر شدید برہمی کا اظہار کرکے اسے ‘فیک نیوز میڈیا قرار دے دیا۔ صدر ٹرمپ نے اپنے سوشل میڈیا پلیٹ فارم ‘ٹروتھ سوشل’ پر لکھا کہ فیک نیوز میڈیا اپنی ساکھ مکمل طور پر کھو چکا ہے ، یہ کہتا ہے ایران جنگ جیت رہا ہے ، فیک نیوز میڈیا کو ٹرمپ ڈرینجمنٹ سنڈروم’ لاحق ہے ۔ امریکی صدر نے اپنی پوسٹ میں مزید لکھا کہ سب جانتے ہیں کہ ایران جنگ بُری طرح ہار رہا ہے ، اس کی بحریہ اور فضائیہ ختم ہو چکی ہے جبکہ دفاعی نظام بھی اب موجود نہیں رہا، اس کا ریڈار سسٹم، میزائل اور ڈرون فیکٹریاں بڑی حد تک تباہ ہو چکیں جبکہ ایرانی قیادت اب ان میں موجود نہیں ہے ۔ٹرمپ نے مزید لکھا کہ ایران کے پاس اب صرف سمندری بارودی سرنگوں کی دھمکی باقی رہ گئی ہے ، بارودی سرنگیں بچھانے والی ایران کی تمام 28 کشتیاں سمندر برد ہو چکی ہیں۔ صدر ڈونالڈ ٹرمپ کا کہنا تھا کہ دنیا کی خاطر آبنائے ہرمز کو بارودی سرنگوں سے صاف کرنے کا عمل شروع کر رہے ہیں، چین، جاپان، جنوبی کوریا، فرانس اور جرمنی کی خاطر آبی گزر گاہ کو کلیئر کر رہے ہیں۔ صدر ٹرمپ کا مزید کہنا تھا کہ دیگر ممالک میں یہ کام خود کرنے کی ہمت اور عزم موجود نہیں، مختلف ممالک کے خالی بحری جہاز تیل لینے کیلیے امریکا کا رخ کر رہے ہیں۔
