پاکستان نے ابھینندن کو رہا کردیا ، اے بی وی پی میرے بیٹے کو کب چھوڑے گی؟ لاپتہ نجیب کی والدہ کا سوال

اس سلسلہ میں نیوز 18 سے نجیب کی والدہ نے بات چیت کی ، تو بیماری کی وجہ سے وہ بہت زیادہ بولنے کی حالت میں نہیں تھیں۔ انہوں نے اتنا ہی کہا کہ جب سے نجیب غائب ہوا ہے ، ملک میں ہر طرح کی پریشانی آتی ہے ، لیکن وقت رہتے ہی اس کو حل بھی کرلیا جاتا ہے ۔ ہمارے جانباز پائلٹ کو پاکستان نے گرفتار کرلیا تھا ،لیکن وقت پر ہم نے اس کو بھی رہا کرالیا ۔ لیکن میرے بیٹے نجیب کے غائب ہونے میں ایسا کیا ہے کہ حکومت اور ملک کی بڑی سے بڑی ایجنسیاں دہلی پولیس ، سی بی آئی اور ایس آئی ٹی اس کو تلاش نہیں کرپارہی ہیں ۔ میں جاننا چاہتی ہوں کہ میرا بیٹا کب لوٹ کر آئے گا ۔ کب اے بی وی پی اس کو رہا کرے گی۔

نجیب کے بھائی حسیب احمد نے بتایا کہ ان کی والدہ اس وقت بیمار ہیں۔ کہیں بھی آمدورفت نہیں کرسکتی ۔ ان کے شولڈر جام ہوگئے ہیں۔ بلڈ پریشر اور شوگر کی وجہ سے پہلے ہی ان کی طبیعت خراب چل رہی تھی ۔ اب دن بہ دن وہ زیادہ بیمار رہنے لگی ہیں۔