امرتسر۔ 22 جون (یو این آئی) پنجاب میں اسپیشل انٹینسیو ریویژن (ایس آئی آر)-2026 کے تحت ووٹر لسٹوں کی نظر ثانی کیلئے 25 جون کو گھر گھر شماری مہم شروع ہوگی۔ یہ مہم 24 جولائی 2026 تک جاری رہے گی جس کے دوران بوتھ لیول آفیسرز ووٹر کی تفصیلات کی تصدیق کریں گے اور گنتی کے فارم جمع کریں گے ۔ضلع الیکشن افسر اور ڈپٹی کمشنر دلویندرجیت سنگھ نے پیر کو کہا کہ امرتسر ضلع کے 11 اسمبلی حلقوں میں ایس آئی آر-2026 مہم کی تمام تیاریاں مکمل کر لی گئی ہیں۔ انہوں نے بتایا کہ ضلع میں کل 19,73,071ووٹرز ہیں جن میں سے 17,49,155 ووٹرز(88.65 فی صد) کی میپنگ پہلے ہی مکمل ہو چکی ہے ۔ انہوں نے کہا کہ انتخابی عملے کی تیاریوں اور عمل درآمد کے عمل کا جائزہ لیا گیا ہے ۔ تمام افسران اور ملازمین نے اس بات کو یقینی بنانے کیلئے ضروری تربیت حاصل کر لی ہے کہ کسی بھی اہل شہری کو ووٹر لسٹ میں شامل کرنے سے خارج نہ کیا جائے اور کسی بھی نااہل شخص کا نام فہرست میں شامل نہ ہو۔
ڈسٹرکٹ الیکشن آفیسر نے کہا کہ ووٹر لسٹ غلطیوں سے پاک ہونے کو یقینی بنانے کے لیے تمام عمل کو مقررہ وقت کے اندر مکمل کیا جائے گا۔ شعور بیدار کرنے کے لیے بڑے پیمانے پر تشہیری مہم بھی چلائی جا رہی ہے ۔ انہوں نے ضلع کے تمام شہریوں سے اپیل کی کہ وہ گھر گھر گنتی کے دوران بی ایل اوز کے ساتھ مکمل تعاون کریں اور درست اور تازہ ترین معلومات فراہم کریں، شفاف اور درست ووٹر لسٹ کو یقینی بنائیں۔ انتظامیہ کے مطابق یہ خصوصی نظرثانی مہم آئندہ انتخابات کے پیش نظر ووٹر لسٹ کو زیادہ درست اور اپ ٹو ڈیٹ یقینی بنانے کی جانب ایک اہم قدم ہے ۔
