کریم نگر۔17 اکٹوبر ۔ ( سیاست ڈسٹرکٹ نیوز ) کریم نگر پولس کمشنر ایل سبرائیڈو نے کہا کہ تلنگانہ ریاستی اسمبلی کے انتخابی ضابطے نافذ ہیں، اس لیے ضلع میں غیر قانونی رقم، شراب اور دیگر چیزوں کو روکنے کیلئے وقتاً فوقتاً کئی جگہوں پر چیک پوسٹیں قائم کی جارہی ہیں اور گاڑیوں کی چیکنگ کی جارہی ہے۔ تلاشی مہم کے دوران آج انسپکٹر رام چندر راؤ نے ضلع کے کریم نگر ٹو ٹاؤن پولیس اسٹیشن کے تحت کریم نگر سرکٹ ریسٹ ہاؤس سڑک پر گاڑیوں کی تلاشی مہم کے دوران WRITER SAFE GUARD Pvt. لمیٹڈ وین نمبر TS 09 UD 5198 گاڑی میں 2,36,48,494 روپئے (دو کروڑ چھتیس لاکھ اڑتالیس ہزار چار سو چورانوے روپئے ) بغیر کسی مناسب ثبوت کے پائے گئے ، چنانچہ انتخابی قواعد کے مطابق فوری طور پر مقامی ریٹرننگ آفیسر اور محکمہ انکم ٹیکس کو بھیج دیئے گئے۔ انہوں نے کہا کہ انہیں مزید کارروائی کے لیے ریٹرننگ آفیسر کی موجودگی میں ڈسٹرکٹ الیکشن آفیسر کی جانب سے تشکیل دی گئی ڈسٹرکٹ شکایات کمیٹی کے حوالے کر دیا گیا ہے ۔ اب تک ضلع بھر میں ضبط کی گئی نقد رقم 2 کروڑ 84 لاکھ 67 ہزار 452 روپئے ہے۔ انہوں نے کہا کہ انتخابی ضوابط کے نفاذ کے لیے تمام ضروری اقدامات کیے گئے ہیں۔ پولیس کمشنر نے انسپکٹر رام چندر راؤ، ایس آئی چائنا نائیک، ہیڈکانسٹیبل سرینواس، گننیشور اور کانسٹیبل رویندر ملائیہ کو بڑی رقم ضبط کرنے کی کوششوں پر خصوصی طور پر مبارکباد دی۔اس پروگرام میں مقامی ریٹرننگ آفیسر (آر ڈی او) کے مہیشور، اے سی پی ٹاؤن نریندر، دو ٹاؤن انسپکٹر کے رام چندر راؤ اور دیگر پولیس اہلکاروں نے حصہ لیا۔
