نینی تال : کماون ڈویژن کے کمشنر دیپک راوت اتراکھنڈ کے ہلدوانی میں تجاوزات ہٹانے کے دوران ہوئے ہنگامے کی تحقیقات کریں گے ۔ وہ 15 روز میں تحقیقاتی رپورٹ حکومت کو پیش کریں گے ۔ حکومت نے ہفتہ کو مجسٹریل انکوائری کی ہدایات جاری کیں۔ چیف سکریٹری رادھا راتوڑی کے مطابق کماؤن کمشنر پورے معاملے کی جانچ کریں گے اور 15 دنوں میں حکومت کو رپورٹ پیش کریں گے ۔ تفتیش میں تمام نکات شامل کیے گئے ہیں۔ تحقیقات میں یہ بھی ذہن میں رکھا جائے گا کہ کیا انتظامیہ نے کوئی غلطی کی ہے ؟ دوسری جانب ہلدوانی پولیس نے اس معاملے میں اب تک تین کیس درج کیے ہیں۔ پانچ افراد کو گرفتار کر لیا گیا ہے ۔ نینی تال کے سینئر سپرنٹنڈنٹ آف پولیس (ایس ایس پی) پی ایس مینا کے مطابق سی سی ٹی وی اور ویڈیو ریکارڈنگ کی جانچ کرکے ملزمین کی شناخت کا عمل جاری ہے ۔ جلد مزید گرفتاریاں کی جائیں گی۔ دریں اثنا، ضلع انتظامیہ نے آج ہلدوانی شہر کے کچھ علاقوں سے کرفیو ہٹا دیا ہے ۔ پورے بنبھول پورہ کے ساتھ ساتھ ملحقہ آرمی کینٹ، ورکشاپ لائن، تکونیا، تین پانی اور گولاپار میں کرفیو جاری رہے گا۔ انتظامیہ نے باقی علاقوں کو کرفیو سے باہر کردیا ہے ۔
