حیدرآباد 3جولائی(یواین آئی) تلنگانہ قانون ساز کونسل کی رکن کے کویتا نے کہا ہے کہ امریکن تلگوایسوسی ایشن (اے ٹی اے ) کانگریس میں پہلی بار تلنگانہ پویلین قائم کرنا خوشی کی بات ہے ۔ کویتا نے واشنگٹن ڈی سی، امریکہ میں ایسوسی ایشن کی 17ویں کانگریس میں حصہ لیا، تلنگانہ پویلین کا افتتاح کیا۔انہوں نے کہا کہ امریکہ میں تلگو عوام کو تلنگانہ حکومت کے متعارف کردہ پروگراموں سے واقف کروانے کے لئے مہاسبھا میں تلنگانہ پویلین قائم کرنا فخر کی بات ہے ۔انہوں نے کہا کہ ریاستی حکومت کی طرف سے تلنگانہ پویلین کے ذریعہ منعقد کئے جانے والے پروگرام دیگر ریاستوں کے لئے ایک تحریک بن سکتے ہیں۔ انہوں نے ایسوسی ایشن کے نمائندوں سے کہا کہ وہ ہر مہاسبھا میں تلنگانہ پویلین قائم کریں۔انہوں نے نشاندہی کرتے ہوئے کہا کہ تلگودیشم پارٹی کے بانی و متحدہ آندھراپردیش کے سابق وزیراعلی این ٹی راماراو نے ایک زمانے میں ہندوستان میں تلگو عوام کو پہچان دلائی تھی اور اب ان کے والد و تلنگانہ کے وزیراعلی کے چندرشیکھرراونے تلنگانہ کے عوام کو ہندوستان میں پہچان دلائی ہے ۔ اسی طرح اس تنظیم نے امریکہ میں تلگو عوام کو پہچان دلائی ہے ۔انہوں نے مہاسبھا کے ذریعہ نئی نسلوں کو تلگوثقافت سے آگاہ کرنے پر تنظیم کے نمائندوں کی کوششوں کی ستائش کی۔انہوں نے یاد دلایا کہ امریکہ میں تلگو لوگ ہندوستان کے فخر کی حیثیت اختیار کر چکے ہیں۔انہوں نے تجویز پیش کی کہ اگر امریکہ میں تلگو ایسوسی ایشنز کھیلوں اور دیگر کھیلوں کے لیے کسی بھی شہر میں ہیڈ کوارٹر قائم کریں،تلگو ثقافت وروایات کو فروغ دینے کے لیے میوزیم قائم کریں تو یہ آنے والی نسلوں کے لیے بہت مفید ثابت ہوگا۔انہوں نے یاد دلایا کہ مالدیپ اور ماریشس کے تمام تلگو لوگوں نے تلگو زبان اور ثقافت کو برقرار رکھنے کے لیے ریاستی حکومت اور تلگو یونیورسٹیوں کے ساتھ ایک معاہدے پر دستخط کیے ہیں۔
