نئی دہلی،17 ستمبر (آئی اے این ایس) ہندوستان کو اکتوبر میں باکو میں منعقد ہونے والے پہلے فیفا انڈر 15 ورلڈ کپ کے گروپ کے میں بحرین، کیمرون، گریناڈا، لاؤس اور سینیگال کے ساتھ رکھا گیا ہے۔ہندوستان کی انڈر 15 مردوں کی ٹیم باکو کے ہووسان مقابلہ جاتی کمپلیکس میں کوالیفائنگ مرحلے کے دوران تین دن میں پانچ میچ کھیلے گی۔ہندوستان اپنی مہم کا آغاز 24 اکتوبر کو لاؤس کے خلاف کرے گا۔ اس کے اگلے ہی روز یعنی 25 اکتوبر کو ہندوستان دو میچ کھیلے گا۔ پہلے مقابلے میں اس کا سامنا کیمرون سے ہوگا، جس کے بعد گریناڈا کے خلاف میچ کھیلا جائے گا۔ دونوں میچ پچ ایک بی پر منعقد ہوں گے۔ہندوستان 26 اکتوبر کو کوالیفائنگ مرحلے میں مزید دو میچ کھیل کر اس مرحلے کا اختتام کرے گا۔ پہلے مقابلے میں ہندوستان کا سامنا پچ نو اے پر بحرین سے ہوگا، جبکہ اس کے بعد پچ آٹھ اے پر سینیگال کے خلاف میچ کھیلا جائے گا۔چونکہ یہ ٹورنمنٹ فیفا کی تمام رکن ایسوسی ایشنز کے لیے کھلا ہے، اس لیے 191 قومی ٹیموں کو 32 گروپس میں تقسیم کیا گیا ہے۔ چھ مسابقتی دنوں کے دوران 20 میدانوں پر مجموعی طور پر943 میچ کھیلے جائیں گے۔فیفا انڈر 15 ورلڈ کپ اور فیسٹیول کے میچ آٹھ کھلاڑیوں پر مشتمل ٹیموں کے فارمیٹ میں کھیلے جائیں گے۔ ہر میچ 20، 20 منٹ کے دو ہاف پر مشتمل ہوگا، جبکہ ہاف ٹائم میں پانچ منٹ کا وقفہ ہوگا۔ میدان 68 میٹر لمبا اور 50 میٹر چوڑا ہوگا۔ میچ کے دوران کھلاڑیوں کی مسلسل تبدیلی کی اجازت ہوگی۔شریک ٹیمیں 22 اکتوبر کو باکو پہنچیں گی، جس کے بعد 23 اکتوبر کو باضابطہ تربیتی دن ہوگا۔ کوالیفائنگ مرحلہ 24 سے 26 اکتوبر تک جاری رہے گا، جبکہ 27 اکتوبر کو آرام کا دن ہوگا۔ٹورنمنٹ کا مرحلہ 28 اور 29 اکتوبر کو کھیلا جائے گا، جبکہ مختلف درجات کے فائنلز30اکتوبر کو منعقد ہوں گے۔ ہندوستانی ٹیم اس وقت بنگلورو کے مرکز برائے کھیلوں کی عمدگی میں تربیتی کیمپ میں موجود ہے۔ آذربائیجان روانہ ہونے سے قبل ہندوستانی ٹیم ملک میں بین الاقوامی دوستانہ میچ بھی کھیلے گی، جس کے بعد 14 کھلاڑیوں پر مشتمل حتمی اسکواڈ کے ساتھ آذربائیجان روانہ ہوگی۔اگرچہ انڈر 15 ورلڈ کپ کا پہلا ایڈیشن فیفا کی تمام رکن ایسوسی ایشنز کی کھلاڑیوں کی ٹیموں کے لیے کھلا ہے، تاہم 2027 میں ہونے والے دوسرے ایڈیشن میں صرف لڑکیوں کی ٹیمیں حصہ لیں گی۔2028 سے فیفا کی تمام رکن ایسوسی ایشنز کو دو الگ الگ مقابلوں میں اپنی لڑکوں اور لڑکیوں کی انڈر 15 ٹیموں کے ساتھ شرکت کی دعوت دی جائے گی۔امید رکی جارہی ہے کہ ہندوستانی ٹیم اپنی تیاری کے مطابق بہتر مظاہرے کرتے ہوئے ورلڈ کپ میں شاندار کارکردگی دکھائے گی۔
