ہیملٹن۔ اوپنرسمرتی مندنا اور نائب کپتان ہرمن پریت کورکی سنچریوں کی بدولت ہندستان نے ہفتہ کو آئی سی سی ویمنز ونڈے ورلڈ کپ میں ویسٹ انڈیز کو155 رنز سے شکست دے کر جیت کی راہ پر واپسی کی ہے ۔ پہلے بیٹنگ کرتے ہوئے ہندوستان نے آٹھ وکٹوں پر 317 رنز کا ہمالیائی اسکور بنایا جو ٹورنمنٹ کی تاریخ میں اس کا سب سے بڑا اسکور ہے۔مندنا نے 123 گیندوں میں 13 چوکوں اور دو چھکوں کی مدد سے 119 رنز بنا کر اپنی پانچویں ونڈے سنچری بنائی اور مقابلے کی بہترین کھلاڑی کا ایوارڈ حاصل کیا۔ ساتھ ہی ہرمن پریت نے 107 گیندوں میں 10 چوکوں اور دو چھکوں کی مدد سے 109 رنز بنائے۔ 2017 ورلڈ کپ میں آسٹریلیا کے خلاف ناقابل شکست 171 رنز بنانے کے بعد یہ ان کی چوتھی اور پہلی سنچری ہے۔دونوں نے چوتھی وکٹ کے لیے 184 رنزکی شراکت داری کرتے ہوئے ہندوستان کو 200 رنز تک پہنچایا۔ یہ ویمنز ورلڈ کپ میں ہندوستان کے لیے کسی بھی وکٹ کی سب سے زیادہ شراکت ہے۔اس سے قبل کپتان متھالی راج نے ٹاس جیت کر بیٹنگ کا فیصلہ کیا تھا۔ویسٹ انڈیز کی جانب سے انیسہ محمد نے 59 رنز کے عوض دو جبکہ ہیلی میتھیوز، شکیرا سلمان، ڈینڈرا ڈوٹن اور عالیہ ایلن نے فی کس ایک وکٹ حاصل کی۔یاستیکا بھاٹیہ نے21 گیندوں میں 31 رنز بنائے اور پہلی وکٹ کی شراکت میں صرف 6.3 اوورز میں 49 رنز جوڑے۔ ان کے آؤٹ ہونے کے بعد کپتان میتھالی (پانچ) اور دیپتی شرما (15) بھی جلد آؤٹ ہوگئیں۔اس کے بعد مندنا اورکور نے 20 اوورز میں 100 رنز بناکر ہندوستان کی اننگز کو آگے بڑھایا۔ ہندوستان کے 200 رنز 35.4 اوورز میں مکمل۔ مندنا نے اپنی پہلی نصف سنچری 66 گیندوں میں اور دوسری 43 گیندوں میں مکمل کی۔ انہیں بھی 96 رنز کے اسکور پر ایلین نے زندگی بخشی۔ اس کے علاوہ وہ ایل بی ڈبلیو کی اپیل پر بھی بچ گئیں۔اس جیت کے ساتھ ہی ہندوستان تین میچوں کے بعد آٹھ ٹیموں میں سرفہرست ہے۔ آسٹریلیا، نیوزی لینڈ اور جنوبی افریقہ کے بھی چار پوائنٹس ہیں لیکن ہندوستان کا نیٹ رن ریٹ بہتر ہے۔کامیابی کے بڑے ہدف کے تعاقب میں ویسٹ انڈیزکی شروعات اچھی رہی۔اوپنرز ڈینڈرا ڈوٹن (62) اور ہیلی میتھیوز (43) نے 12.1 اوورز میں 100 رنز جوڑے۔ تاہم اس کے بعد اسپنر سنیہ رانا اور فاسٹ بولرمیگھنا سنگھ نے بالترتیب تین اور دو وکٹیں لے کر ٹاپ آرڈرکو دباؤ میں ڈال دیا۔ ویسٹ انڈیز کا اسکور 19 اوورز کے بعد چار وکٹوں پر 114 رنز تھا۔ پوجا وستراکر نے شیمن کیمبل (11) اور راجیشوری گائیکواڑ کو چنیل ہنری (7) کو پویلین بھیجا۔ اس کے بعد گائیکواڑ اور رانا نے عالیہ ایلن (4) کو رن آؤٹ کیا جبکہ جھولن گوسوامی نے انیسہ محمد (2) کو پویلین بھیجا جس کے بعد وہ اب ورلڈ کپ میں سب سے زیادہ 40 وکٹیں لینے والی بولر بن گئی ہیں۔
