ممبئی:برصغیر کی پہلی بولتی فلم ’’عالم آراء ‘‘14 مارچ 1931ء کو ریلیز ہوئی تھی۔اس فلم کے ہدایت کار اردشیر ایرانی تھے ، فلم کے ہیرو ماسٹر وٹھل اور ہیروئن زبیدہ تھیں۔ فلم میں پرتھوی راج کپور بھی ایک اہم کردار تھے ۔ایک شہزادے اور قبائلی لڑکی کی محبت کی کہانی پر مبنی یہ فلم ایک پارسی ڈرامہ سے متاثر تھی۔عالم آرا میں کام کرنے کیلئے ماسٹر وٹھل نے شاردا اسٹوڈیو کے ساتھ اپنا کانٹریکٹ بھی توڑ دیا تھا۔ اسٹوڈیو نے بعد میں وٹھل کو عدالت میں بھی گھسیٹا اور جس شخص نے ماسٹر وٹھل کی پیروی کی وہ وکیل کوئی اور نہیں خود بانی پاکستان محمد علی جناح تھے ۔وزیر محمد خان نے اس فلم میں فقیر کا کردار اداکیا تھا۔ فلم ایک بادشاہ اور اس کی دو بیویوں دل بہار اور نوبہار کی کہانی تھی جن کی آپس میں کبھی نہیں بنتی تھی۔ دونوں کے درمیان جھگڑا تب مزید بڑھ جاتا ہے جب ایک فقیرپیشن گوئی کرتا ہے کہ بادشاہ کے جانشین کو نوبہار جنم دے گی۔ طیش میں آکر دل بہار بادشاہ سے انتقام کی غرض سے ریاست کے وزیر عادل سے محبت کا اظہار کرتی ہے لیکن عادل اس کے پیار کو ٹھکرا دیتا ہے ۔ دل بہار عادل کو جیل میں ڈلوا دیتی ہے اور اس کی بیٹی عالم آرا کو ملک بدر کر دیتی ہے ۔ عالم آرا کی پرورش بنجارے (قبائلی)کرتے ہیںجوان ہونے پر عالم آرا محل میں واپس آتی ہے اور شہزادہ سے محبت کرنے لگتی ہے۔ آخر میں دل بہار کو اس کے کئے کی سزا ملتی ہے، شہزادہ اور عالم آرا کی شادی ہوتی ہے اور وزیر عادل جیل سے رہا ہوتا ہے۔
