بڑھتی قیمتوں پر قابوپانے مرکزی حکومت کے اقدامات
نئی دہلی۔6؍ستمبر ( ایجنسیز ) مرکزی حکومت کی جانب سے پیاز کی بڑھتی ہوئی قیمتوں پر قابو پانے کیلئے رعایتی نرخوں پر پیاز کی فروخت شروع کی گئی ہے۔ حکومت نے فروخت شروع ہونے کے ابتدائی 10 دنوں میں ملک کے 17 مختلف شہروں میں تقریباً 4 ہزار ٹن بفر پیاز فروخت کی ہے۔ صارفین امور کی سکریٹری ندھی کھرے نے اتوار کو یہ معلومات دی۔ مرکزی حکومت کے پاس 2026 کیلئے قومی کوآپریٹو صارفین فیڈریشن (NCCF) اور بھارتی قومی زرعی کوآپریٹو مارکیٹنگ فیڈریشن (NAFED) کے ذریعہ 1.21 لاکھ ٹن پیاز کا بفر اسٹاک موجود ہے۔یہ ایجنسیاں قیمتوں پر قابو پانے کیلئے پیداواری ریاستوں سے ذخیرہ کی گئی پیاز تھوک کھپت والے مراکز تک پہنچا رہی ہیں۔ اس کے لیے مخصوص ریلوے ریک ’کاندا ایکسپریس‘ اور ٹرکوں کا استعمال کیا جا رہا ہے۔ منتخب قیمت کے لحاظ سے اہم شہروں میں پیاز 35 روپے فی کلوگرام کی رعایتی قیمت پر فروخت کی جا رہی ہے۔ ندھی کھرے نے کہاکہ ’کاندا ایکسپریس‘ کے ذریعے دہلی اور چنئی میں پیاز کی کھیپ پہنچ چکی ہے۔ تیسری کھیپ اب لوڈ کی جا رہی ہے، جسے آنے والے دنوں میں گوہاٹی بھیجا جائے گا۔ندھی کھرے نے کہاکہ بفر پیاز کی تقسیم سے صارفین کو کچھ راحت ملی ہے۔ قیمتوں میں معمولی کمی آئی ہے۔ انہوں نے بتایا کہ ربیع پیاز کی فصل، جسے عام طور پر سال کے بعد کے مہینوں میں فروخت کے لیے ذخیرہ کیا جاتا ہے، بے موسم بارش کی وجہ سے کٹائی کے دوران کچھ نقصان سے متاثر ہوئی ہے۔صارفین امور کے محکمے کے اعداد و شمار کے مطابق، ملک میں پیاز کی اوسط خوردہ قیمت 50.79 روپے فی کلوگرام رہی جبکہ 28 اگست کو رعایتی فروخت شروع کیے جانے کے وقت یہ قیمت 48.50 روپے فی کلوگرام تھی۔