نئی دہلی : دہلی فساد معاملہ میں قید ناحق کی سزا پا رہے چھ ملزمین کو آج کرکرڈوما کورٹ نے باعزت بری کر دیا۔ دہلی فساد کے بعد ان پر دیال پور تھانہ میں مقدمہ درج ہوا تھا۔ ملزمین شکیل، حبیب رضا، محمد یامین، عثمان، شاہد، محمد فرقان کو عدالت نے وکلاء کی بحث ، مشاہدات اور شواہد کی سماعت کے بعد تمام الزامات سے باعزت بری کر دیا۔ عدالت نے اپنے فیصلے میں کہا کہ ریکارڈ پر جو بھی شواہد پیش کے گئے، وہ ناپائیدار اور ملزم کی نشاندہی کرنے میں ناکام ہیں، نیز یہ بھی ثابت کرنے میں ناکام ہیں کہ ملزمین اس بھیڑ کا حصہ تھے۔ اپنی ایف آئی آر میں ایس ایچ دولی چند پال نے الزام لگایا تھا کہ ایک فسادی ہجوم نے انل پیسٹری شاپ لوٹ لیا اور اس میں آگ لگا دی۔ چنانچہ مذکورہ ملزمان کو پولیس نے مختلف دفعات کے تحت قابل سزا جرم کے الزام میں چارج شیٹ کیا تھا۔
جمعیۃ العلماء ہند کی طرف سے عثمان، حبیب، یامین اور ارشاد کو قانونی مدد فراہم کی گئی۔ وکیل ایڈووکیٹ عبدالغفار نے بتایا کہ جمعیۃ العلماء ہند کے صدر مولانا محمود اسعد مدنی، ناظم عمومی مولانا حکیم الدین قاسمی اور قانونی امور کے نگراں مولانا نیاز احمد فاروقی کے مشورے سے قانونی چارہ جوئی کی جا رہی ہے، جس کی وجہ سے ملزمین لگاتار عدالتوں سے باعزت بری ہو رہے ہیں۔
