حیدرآباد14۔اپریل (سیاست نیوز) یونائٹیڈ مسلم فورم نے صدر آل انڈیا مسلم پرسنل لا بورڈ مولانا سید رابع حسنی ندوی کے انتقال پر گہرے دکھ کا اظہار کیا ۔ فورم کے ذمہ داران مفتی صادق محی الدین فہیم صدر ، مولانا سید شاہ علی اکبر نظام الدین حسینی صابری ، مولانا سید محمد قبول بادشاہ شطاری ، مولانا خالد سیف اللہ رحمانی ، مولانا شاہ محمد جمال الرحمن مفتاحی ، مولانا میر قطب الدین علی چشتی ، جناب ضیاء الدین نیر، جناب سید منیر الدین احمد مختار (جنرل سکریٹری) اور دوسروں نے مشترکہ بیان میں کہا کہ مولانا کہ انتقال سے امت مسلمہ کا عظیم نقصان ہوا ۔ مولانا ایک جید عالم دین قابل ادیب اور بے باک رہنما تھے۔ دنیا کی انتہائی با اثر مسلم شخصیات میں ان کا شمار ہوتا تھا ۔ اللہ تعالیٰ مولانا کو جنت الفردوس میں جگہ نصیب فرمائیں اور امت مسلمہ کو ان کا نعم البدل نصیب فرمائے۔ر
