نئی دہلی۔17؍جون ( ایجنسیز) سپریم کورٹ نے نیٹ۔یو جی 2026 کے امتحان کے دوبارہ انعقاد کیخلاف دائر مفادِ عامہ کی درخواست پر فوری سماعت کرنے سے انکار کر دیا ہے۔ عدالت نے کہا ہے کہ اس معاملے سے متعلق درخواستیں پہلے ہی ایک متعلقہ بنچ کے زیرِ غور ہیں لہٰذا موجودہ عرضی بھی جولائی میں اسی بنچ کے سامنے سماعت کے لیے پیش کی جائے گی۔چیف جسٹس سوریہ کانت کے روبرو درخواست گزار کی جانب سے معاملے کی فوری سماعت کی استدعا کی گئی۔ عرضی میں این ٹی اے (نیشنل ٹیسٹنگ ایجنسی)کے اس فیصلے کو چیلنج کیا گیا ہے جس کے تحت 3 مئی کو منعقد ہونے والا نیٹ۔یو جی امتحان منسوخ کر کے ملک بھر میں تقریباً 22 لاکھ امیدواروں کے لیے دوبارہ امتحان کرانے کا فیصلہ کیا گیا تھا۔درخواست گزاروں کا مؤقف ہے کہ پیپر لیک اور امتحانی بے ضابطگیوں کی مکمل جانچ اور ذمہ دار افراد کے خلاف سخت کارروائی ضروری ہے لیکن اس کی قیمت لاکھوں ایسے طلبہ سے نہیں وصول کی جا سکتی جن کا ان معاملات سے کوئی تعلق نہیں تھا۔ درخواست گزاروں کا کہنا ہے کہ اس کے امتحان منسوخ کرنے اور دوبارہ انعقاد کا فیصلہ لاکھوں امیدواروں کے لیے ذہنی دباؤ، تعلیمی نقصان اور اضافی مالی بوجھ کا سبب بنا ہے۔عرضی میں امتحانات کے نظام میں وسیع اصلاحات کا مطالبہ بھی کیا گیا ہے۔ اس میں آزاد نگرانی کا مؤثر نظام، بہتر حفاظتی اقدامات، حیاتیاتی شناختی توثیق، خفیہ ڈیجیٹل سوال ناموں کی ترسیل اور مصنوعی ذہانت پر مبنی نگرانی جیسے جدید انتظامات شامل ہیں تاکہ مستقبل میں اس نوعیت کی بے ضابطگیوں کو روکا جا سکے۔
