نئی دہلی۔بی سی سی آئی کے صدر سورو گنگولی نے ہندوستانی کپتان کے طور پر اپنے دور میں کرکٹ کے تمام فارمیٹس میں ٹیم کو نئی بلندیوں پر لے جانے پر ویراٹ کوہلی کی تعریف کی ہے لیکن کہا کہ اس اسٹار بیٹر کا ٹسٹ کپتانی چھوڑنے کا فیصلہ ذاتی تھا۔ بورڈ اس کا بے حد احترام کرتا ہے۔ جنوبی افریقہ کے خلاف 1-2 کی سیریز میں شکست کے ایک دن بعد کوہلی نے ہفتہ کو ہندوستان کے ٹسٹ کپتان کے عہدے سے دستبردار ہونے کا اچانک اعلان کیا۔ 33 سالہ کوہلی نے اپنی قیادت میں 68 ٹسٹ میں 40 فتوحات کے ساتھ کھیل کے طویل ترین فارمیٹ میں ہندوستان کے سب سے کامیاب کپتان کے طور پر اپنا دور مکمل کیا۔ انہوں نے ٹیم کو آسٹریلیا میں تاریخی ٹسٹ سیریز جیتنے میں بھی مدد کی اور انہیں آئی سی سی ٹسٹ رینکنگ میں سب سے اوپر لے گئے۔ ان کی قیادت میں، ہندوستان نے بھی افتتاحی آئی سی سی ورلڈ ٹسٹ چمپئن شپ کے فائنل تک رسائی حاصل کی۔ کوہلی کی قیادت میں ہندوستانی کرکٹ نے کھیل کے تمام فارمیٹس میں تیزی سے ترقی کی ہے۔ان کا فیصلہ ذاتی ہے اور بی سی سی آئی اس کا بے حد احترام کرتا ہے… وہ مستقبل میں اس ٹیم کو نئی بلندیوں تک لے جانے کے لیے ایک اہم رکن ہوں گے۔ ایک عظیم کھلاڑی، شاباش۔گنگولی نے اپنے ٹویٹ میں کہا۔ کوہلی نے اس سے قبل 2021 کے ٹی20 ورلڈ کپ کے بعد ٹی20 کی کپتانی چھوڑ دی تھی لیکن بی سی سی آئی کے اس عہدے پر برقرار رہنے کی خواہش کے باوجود انہیں ہندوستان کے ونڈے کپتان کے طور پر تبدیل کرنے کا فیصلہ تنازعہ کا باعث بنا تھا اور بورڈ کے علاوہ صدر گنگولی کے ساتھ کوہلی کے تعلقات کشیدہ ہو گئے تھے۔ جبکہ گنگولی نے ایک انٹرویو میں کہا کہ انہوں نے کوہلی سے کہا تھا کہ وہ 2021 کے ورلڈ کپ سے قبل ٹی20 کپتانی سے دستبردار نہ ہوں۔ لیکن دوسری جانب کوہلی نے یہ کہہ کر اس کی تردید کی کہ انہیں کسی نے بھی اس عہدے پر فائز رہنے کو نہیں کہا۔ بعد ازاں چیف سلیکٹر چیتن شرما نے بھی کوہلی کے ان دعوؤں کی تردید کی کہ انہیں ٹی20 کپتان کے طور پر واپس رہنے کو نہیں کہا گیا تھا۔
کوہلی کا فیصلہ حیران کن : روہت
نئی دہلی۔ ہندوستان کے سفید گیند کے کپتان روہت شرما نے اتوار کے روزکہا کہ وہ ویراٹ کوہلی کے ٹیم کے ٹسٹ کپتان کے عہدے سے دستبردار ہونے کے فیصلے سے حیران ہیں لیکن انہوں نے انہیں مستقبل کے لئے نیک خواہشات کا اظہار کیا۔جنوبی افریقہ کے خلاف 1-2 کی سیریز میں شکست کے ایک دن بعد کوہلی نے ہفتہ کو ہندوستان کے ٹسٹ کپتان کے عہدے سے دستبردار ہونے کا اچانک اعلان کیا۔33 سالہ کوہلی نے کھیل کے سب سے طویل فارمیٹ میں ہندوستان کے سب سے کامیاب کپتان کے طور پر اپنی مدت پوری کی۔ایم ایس دھونی سے باگ ڈور سنبھالنے کے بعد انہوں نے 68 ٹسٹ میچوں میں ہندوستان کی قیادت کی ہے اور 58.82 کی جیت کے تناسب سے 40 فتوحات حاصل کی ہیں۔ ٹسٹ کپتان کے طور پر انہوں نے 2015 میں سری لنکا کے خلاف اپنی پہلی سیریز جیت درج کی، یہ جیت ہندوستان نے 22 سال بعد سری لنکا میں حاصل کی۔ روہت نے اتوار کو ایک انسٹاگرام پوسٹ میں کہا حیرت زدہ!! لیکن ہندوستانی کپتان کے طور پر ایک کامیاب عہدہ پر مبارکباد۔مستقبل کے لیے تمام نیک خواہشات۔ روہت نے ہندی میں یہ باتیں کہیں۔قابل ذکر بات یہ ہے کہ روہت اب سب سے طویل فارمیٹ میں ہندوستان کی قیادت کرنے والے سب سے آگے ہیں کیونکہ انہیں حال ہی میں ختم ہونے والی جنوبی افریقہ سیریز سے قبل ہندوستانی سلیکٹرز نے ٹسٹ نائب کپتان مقرر کیا تھا۔تاہم عضلات میں جکڑن کی تکلیف نے انہیں سیریز سے باہرکردیا۔34 سالہ روہت شرما جنوری 2021 میں بارڈر۔گواسکر ٹرافی کے آخری دو ٹسٹ میچوں کے لیے ٹسٹ ٹیم میں واپس آنے کے بعد سے ہندوستان کے بہترین بیٹرکے طور پر ابھرے ہیں۔
