ویسٹ انڈیز ۔افریقہ مقابلہ بھی بارش کی نذر

ساؤتھمپٹن۔11 جون (سیاست ڈاٹ کام )کرکٹ ورلڈکپ 2019 میں ایک اور میچ بارش کی نذر ہو گیا اور ویسٹ انڈیز اور جنوبی افریقہ کے درمیان میچ بارش کے باعث منسوخ کردیا گیا۔ ساؤتھمپٹن میں کھیلے گئے میچ میں ویسٹ انڈیز کے کپتان جیسن ہولڈر نے ٹاس جیت کر پہلے بولنگ کرنے کا فیصلہ کیا تھا۔ اننگز کے آغاز میں ہی 11 کے مجموعے اسکور پر جنوبی افریقہ کے اوپنر ہاشم آملہ 6 رنز بنانے کے بعد پویلین لوٹ گئے۔ ابھی ٹیم اس نقصان سے سنبھلی بھی نہ تھی کہ شیلڈن کوٹریل نے ایک اور وکٹ حاصل کرتے ہوئے پانچ رنز بنانے والے ایڈن مرکرم کی اننگز کا خاتمہ کردیا۔ میچ کے آٹھویں اوورکی تیسری گیند کے بعد بارش کے سبب میچ کو روک دیا گیا اور دونوں ٹیموں نے پویلین کی راہ لی۔ اس کے بعد امپائرز نے میچ کے آغاز کے لیے کئی مرتبہ میدان کا جائزہ لیا لیکن مسلسل بارش کے سبب دونوں کپتانوں کی باہمی رضامندی سے میچ کو منسوخ کردیا گیا۔ میچ منسوخ ہونے کے سبب دونوں ٹیموں کو ایک پوائنٹ دے دیا گیا اور اس کے ساتھ ہی جنوبی افریقہ کی ٹیم نے تین شکستوں کے بعد پوائنٹس ٹیبل پر اپنا کھاتا کھول لیا۔ یاد رہے کہ اس سے قبل پاکستان اور سری لنکا کے درمیان میچ بھی بارش کے سبب بغیر کوئی گیند ہوئے ہی منسوخ کردیا گیا تھا۔ اس سے قبل ویسٹ انڈیز کی ٹیم میں میچ کے لیے 2 تبدیلیاں کی گئی تھیں جہاں آندرے رسل اور لوئس ایونس کی جگہ ڈیرن براوو اور کیمر روچ کو شامل کیا گیا ہے۔اسی طرح جنوبی افریقہ نے بھی اپنی ٹیم میں 2 تبدیلیاں کرتے ہوئے جین پال ڈومینی اور تبریز شمسی کی جگہ ایڈن مرکرم اور بیورن ہینڈرکس کو شامل کیا گیا تھا۔ واضح رہے کہ دونوں ٹیمیں گزشتہ ورلڈکپ سے اب تک صرف 3 مرتبہ ونڈے میچ میں آمنے سامنے آئی تھیں۔ 2015 کے ورلڈکپ میں جنوبی افریقہ نے اے بی ڈی ویلیئرز کی دھواں دھار 66 گیندوں پر 162 رنز کی اننگز کے بدولت ورلڈ کپ میں پہلی مرتبہ 400 رنز کا ہندسہ عبور کر کے ویسٹ انڈیز کو شکست سے دوچار کیا تھا۔

TOPPOPULARRECENT