ممبئی : معروف اداکارہ اور دی گریٹ انڈین کپل شو کی جج ارچنا پورن سنگھ نے اپنی ابتدائی جدوجہد کی کہانی مداحوں کے ساتھ شیئر کی ہے۔ اپنے حالیہ وی لاگ میں انہوں نے بتایا کہ وہ دہرادون سے ایک سوٹ کیس اور جعلی خط کے ساتھ ممبئی آئی تھی تاکہ شہر میں رہائش اختیار کی جائے۔ ارچنا نے بتایا، ’’میں نے اپنے دوست سے ایک جعلی خط لیا تھا اور اس کے ذریعہ رہنے کی جگہ ڈھونڈی۔ ناشتہ کرتے ہی مجھے وہاں سے نکلنا پڑتا تھا کیونکہ لوگ سمجھتے تھے کہ میں کہیں کام پر جاتی ہوں لیکن درحقیقت میں آڈیشنز دینے کیلئے نکلتی تھی۔‘‘ ارچنا نے مزید بتایا کہ ان کا پہلا کام ایک اشتہار میں بطور جونیئر آرٹسٹ تھا، جہاں وہ اوم پوری کے ساتھ تھی۔ اس کام کیلئے انہیں صرف 100 روپئے ملے، لیکن اس چھوٹے سے معاوضے نے انہیں بیحد خوشی دی۔ ارچنا نے کہا، ’’میں نے 100 روپئے کا چیک لیا اور خوشی سے تارڈیو کی سڑکوں پر ناچ رہی تھی۔‘‘ کچھ سال بعد انہیں ایک فلم میں اوم پوری کے ساتھ بطور ہیروئن کام کرنے کا موقع ملا، لیکن بدقسمتی سے وہ فلم ریلیز نہیں ہوسکی۔ دی گریٹ انڈین کپل شو پر 2019 سے اپنی موجودگی کے بارے میں ارچنا نے کہا کہ انہوں نے نوجوت سنگھ سدھو کی جگہ جج کا کردار سنبھالا اور اسے کامیابی سے نبھا رہی ہیں۔ارچنا اپنے شوہر پرمیٹ سیٹھی اور دو بیٹوں آریامن اور آیوشمان کے ساتھ خوشگوار زندگی گزار رہی ہیں۔
