نئی دہلی، 19 نومبر (یواین آئی) مرکزی وزیر خزانہ اور کارپوریٹ امور نرملا سیتارمن نے جمعرات کو مرکزی بجٹ 2027-28 کی تیاریوں کے سلسلے میں انفارمیشن ٹیکنالوجی (آئی ٹی) شعبے کے ماہرین اور متعلقہ فریقوں کے ساتھ سیتارمن نے مرکزی بجٹ 2027-28 کے لیے آئی ٹی شعبے کے نمائندوں کے ساتھ بجٹ سے قبل چھٹی پیشگی مشاورتی میٹنگ کی صدارت کی ۔ اس میٹنگ میں صنعت کے نمائندوں اور پالیسی سازوں نے ملک کے اہم ترقیاتی شعبوں میں شامل آئی ٹی سیکٹر سے متعلق مسائل اور ترجیحات پر تبادلہ خیال کیا۔ نئی دہلی میں منعقدہ یہ میٹنگ آئندہ مرکزی بجٹ پیش کیے جانے سے قبل وزارت خزانہ کی جانب سے منعقد کی جانے والی مشاورتی میٹنگوں کے سلسلے کا حصہ تھی۔ ان مشاورتوں کا مقصد معیشت کے مختلف شعبوں سے پالیسی ترجیحات، سرمایہ کاری کی ضروریات، ابھرتے ہوئے چیلنجوں اور اقتصادی ترقی کو مضبوط بنانے کے ممکنہ اقدامات کے بارے میں تجاویز حاصل کرنا ہے ۔ میٹنگ میں محکمہ اقتصادی امور کے سکریٹری، نیتی آیوگ کے چیف ایگزیکٹیو افسر، وزارت الیکٹرانکس و انفارمیشن ٹیکنالوجی کے سینئر افسران اور حکومت ہند کے چیف اقتصادی مشیر نے شرکت کی۔ اقتصادی پالیسی سے وابستہ اعلیٰ حکام اور الیکٹرانکس و آئی ٹی وزارت کے افسران کی شرکت اس بات کی عکاسی کرتی ہے کہ ملک کی اقتصادی اور ترقیاتی ترجیحات کے تعین میں ٹیکنالوجی کے شعبے کو کتنی اہمیت دی جارہی ہے ۔ آئی ٹی صنعت ہندوستان کی خدمات کی برآمدات، روزگار کے مواقع پیدا کرنے ، اختراعات اور عالمی اقتصادی روابط میں اہم کردار ادا کرنے والا ایک بڑا شعبہ بن چکی ہے ، جبکہ ٹیکنالوجی میں تیز رفتار ترقی مختلف شعبوں کی پیداواری صلاحیت اور مسابقت کو بھی مسلسل متاثر کررہی ہے ۔