کابل: جنوبی افغانستان کے صوبہ قندھار میں کم از کم 600 منشیات کے عادی افراد اصلاحی مرکز میں علاج کے بعد صحت یاب ہوکر اپنے گھروں کو لوٹ گئے۔مقامی نیوز ایجنسی طلوع نیوز نے جمعہ کے روز یہ اطلاع دی۔ رپورٹ میں کہا گیا کہ منشیات کے عادی افراد کو اصلاحی مرکز میں پیشہ ورانہ تربیت بھی دی گئی ہے ۔ رپورٹ میں کہا گیا ہے کہ تمام 600 افراد کو اپنے خاندانوں سے ملایا گیا ہے ۔قبل ازیں نشے کے عادی افراد کا اصلاحی مراکز میں علاج کیا گیا تھا اور ان کی صحت یابی کے بعد انہیں الیکٹریشن اور کارپینٹری جیسے چھ پیشہ ورانہ شعبوں میں تربیت دی گئی اور انہیں اپنے خاندانوں سے دوبارہ ملنے کے بعد کام کرنے اور روزی روٹی کمانے کے لیے پیشہ ورانہ آلات کا پیکج بھی دیا گیا۔افغانستان کی نگراں حکومت نے منشیات کے عادی افراد کو اصلاحی مراکز تک لے جانے کے علاوہ ملک کو منشیات کی لعنت اور منشیات کے استعمال سے دور رکھنے کی کوشش میں افیون کی کاشت اور منشیات کی اسمگلنگ پر پابندی عائد کر دی ہے ۔
