دو روزہ دورہ گجرات میں یوکرین سے لوٹے طلبہ مودی کا استقبال کریں گے
احمد آباد: وزیر اعظم نریندر مودی حالیہ اسمبلی انتخابات میں حکمراں جماعت بی جے پی کی زبردست جیت کے بعد آج اپنی آبائی ریاست گجرات میں ایک عظیم الشان روڈ شو میں حصہ لیں گے ۔پانچ میں سے چار ریاستوں میں ہوئے انتخابات میں بی جے پی کی مکمل اکثریت سے کامیابی کے بعد مودی آج سے گجرات کے دو روزہ دورے پر ہوں گے ۔صبح تقریباً11 بجے یہاں سردار ولبھ بھائی پٹیل بین الاقوامی ہوائی اڈے پرپہنچنے کے بعد مودی وہاں سے بی جے پی کی ریاستی دفترگاندھی نگرکے نزدیک کوبا میں واقع شریکلم تک اپنا روڈ شو شروع کریں گے ۔ 20 کلومیٹر سے لمبے اس روڈ شو کے دوران وزیر اعلیٰ بھوپیندر پٹیل اور ان کے تمام وزراء کے علاوہ ریاست میں پارٹی کے سینئر لیڈر بھی اس روڈ شو کے دوران موجود رہیں گے ۔واضح رہے کہ اس سال کے آخر میں گجرات میں اسمبلی انتخابات بھی ہونے والے ہیں ، جہاں ڈھائی دہائیوں سے زیادہ عرصے سے بی جے پی مسلسل حکومت کر رہی ہے ۔ پارٹی ذرائع کا کہنا ہے کہ حالیہ انتخابی جیت کے ساتھ ہی ریاست میں پارٹی کا پھر سے اقتدار میں تقریباً طے ہو گیا ہے ۔ اس روڈ شو کے ذریعے مسٹر مودی پارٹی میں مزید جوش و خروش پیدا کریں گے ۔ذرائع کے مطابق مودی پارٹی ہیڈکوارٹر میں روڈ شو کے اختتام کے بعد ریاست کے اعلیٰ لیڈروں کے ساتھ میٹنگ بھی کریں گے ۔ وہاں دوپہر کا کھانا کھانے کے بعد وہ راج بھون جائیں گے اور شام کو احمد آباد کے جی ایم ڈی سی گراؤنڈ میں ‘ پنچایت مہاسمیلن’ میں شرکت کریں گے ۔ اس میں مقامی سوراج کے اداروں کے ہزاروں نمائندے شرکت کریں گے ۔روڈ شو کے دوران حال ہی میں جنگ زدہ یوکرین سے واپس لوٹے طلباء ہیں وزیراعظم کا استقبال کریں گے ۔ خیال رہے کہ وزیر اعظم کے دورہ گجرات کے پیش نظر ریاستی اسمبلی کے بجٹ سیشن میں آج خصوصی تعطیل رکھی گئی ہے ۔ اپنے دورے کے دوسرے دن یعنی کل مسٹر مودی رکھشا شکتی یونیورسٹی کے کانووکیشن کی تقریب میں شرکت کریں گے جس میں مرکزی وزیر داخلہ امت شاہ بھی موجود ہوں گے ۔ کل شام وہ احمد آباد کے سردار پٹیل اسٹیڈیم میں کھیل مہاکمبھ کا افتتاح کریں گے ۔ اس موقع پر سپورٹس پالیسی کا اعلان بھی کیا جائے گا۔