اسپیکر کو سیاسی تجویز نہیں لانی چاہئے تھی‘ راہول کی انڈیاا تحاد قائدین کے ساتھ اوم برلا سے ملاقات
نئی دہلی :لوک سبھا اسپیکر اوم برلا کی جانب سے ایمرجنسی کی مذمتی تجویز لائے جانے پر اپوزیشن لیڈر راہول گاندھی نے ناراضگی کا اظہار کیا ہے۔یہ اظہار انہوں نے لوک سبھا اسپکر سے ملاقات کے دوران کیا ہے۔ لوک سبھا کے نو منتخب اسپیکر اوم برلا نے 26 جون کو پارلیمنٹ میں ایمرجنسی کی مذمت کی تجویز پیش کی تھی۔ اس میں انہوں نے ایمرجنسی کی مذمت کی اور اسے ملک کی تاریخ کا سیاہ باب قرار دیا تھا۔ راہول گاندھی نے کہا کہ اسپیکر کو ایسی سیاسی تجویز نہیں لانی چاہئے تھی اور اس سے گریز کرنا چاہئے تھا۔ راہول گاندھی نے انڈیا الائنس کے رہنماؤں کے ساتھ آج اسپیکر اوم برلا سے ملاقات کی۔ اس ملاقات کے بارے میں بتایا جا رہا ہے کہ یہ ایک خیرسگالی ملاقات تھی جو گزشتہ کل ہی ہونے والی تھی مگر اسپیکر کے ذریعے ایمرجنسی والی تجویز کی وجہ سے اپوزیشن ناراض تھا۔ آج ملاقات کے دوران راہول گاندھی نے کل کی ایمرجنسی کی تجویز پر اعتراض کیا۔واضح رہے کہ اسپیکر کے ذریعے ایمرجنسی کی مذمت کی تجویز پر کانگریس کے جنرل سکریٹری کے سی وینوگوپال نے بھی کل 26 جون کو ہی اعتراض کیا تھا۔ انہوں نے کہا تھا کہ یہ ہم سب کے لیے حیران کن ہے کہ اسپیکر نے اسے موضوع بحث بنایا۔ حکومت نے جان بوجھ کر آج کے دن کا انتخاب کیا۔ آج ایوان میں اچھا ماحول تھا۔اسپیکر کا انتخابات ہو رہا تھا مگر بی جے پی اور مرکزی حکومت اس ماحول کو خراب کرنا چاہ رہی تھیں۔کانگریس کے جنرل سکریٹری کے علاوہ سماجوادی پارٹی کے سربراہ اکھلیش یادو نے بھی ایمرجنسی کی مذمت کی تجویز پر بی جے پی کو نشانہ بنایا تھا۔ انہوں نے کہا تھا کہ بی جے پی نے آج جو کچھ بھی کیا ہے وہ صرف دکھاوا ہے۔ اس ایمرجنسی کے وقت صرف وہ ہی جیل نہیں گئے تھے بلکہ ایس پی اور دیگر لیڈروں نے بھی اس وقت کو دیکھا۔ ہم کب تک ماضی کی طرف دیکھتے رہیں گے؟ انہوں نے سوال کیا تھا کہ کیا بی جے پی جمہوریت کے محافظ مجاہدین کو دئے جانے والے الاؤنس میں اضافہ کرے گی؟