نئی دہلی: فوڈ سیفٹی اینڈ اسٹینڈرڈز اتھارٹی آف انڈیا (ایف ایس ایس اے آئی) قومی راجدھانی کی تمام ریاستوں اور مرکز کے زیر انتظام علاقوں میں عمارتوں اور سرکاری دفاتر کی کینٹینوں میں محفوظ کھانے کی اشیاء فراہم کرنے کے مقصد سے کینٹین چلانے والوں کو تربیت فراہم کر رہی ہے ۔ صحت اور خاندانی بہبود کی مرکزی وزارت نے جمعہ کو یہاں کہا کہ اتھارٹی فوڈ سیفٹی ٹریننگ اینڈ سرٹیفیکیشن ( ایف او ایس ٹی اے سی ) پروگرام کے ذریعے ملک بھر میں فوڈ سیفٹی کو فروغ دینے کے لیے ایک مہم چلا رہی ہے ۔ وزارت کے مطابق اتھارٹی نے چار ریاستوں – بہار، کرناٹک، مہاراشٹر اور سکم میں عمارتوں میں تربیتی سیشن منعقد کیے ہیں۔ ان عمارتوں کے تمام فوڈ ہینڈلرز کو ضروری تربیت دی گئی ہے ۔ اس کے علاوہ یہ ٹریننگ ڈپارٹمنٹ آف پرسنل اینڈ ٹریننگ ( ڈی او پی ٹی ) اور نارتھ بلاک میں بھی دی گئی۔ ان تربیتی پروگراموں کا مقصد ریاست اور مرکز کے زیر انتظام علاقوں کی عمارتوں اور سرکاری دفاتر کی عمارتوں میں کینٹینوں میں خوراک کی حفاظت کے معیار کو بہتر بنانا ہے ۔ اگلے چند دنوں میں آندھرا پردیش، تلنگانہ اور منی پور کی عمارتوں میں تربیتی سیشن منعقد کرنے کا منصوبہ بنایا گیا ہے ۔ اس کے علاوہ فوڈ سیفٹی ٹریننگ اینڈ سرٹیفیکیشن پروگرام کے تحت سرکاری دفاتر میں تربیتی سیشن منعقد کیے جائیں گے ۔ ورلڈ فوڈ سیفٹی ڈے کے موقع پر ایف ایس ایس اے آئی نے اگلے تین برسوں میں 25 لاکھ فوڈ بزنس آپریٹرز کو ٹریننگ فراہم کرنے کا اعلان کیا تھا۔ مالی سال 2023-24 کے دوران ملک بھر میں ایف او ایس ٹی اے سی پروگرام میں کل تین لاکھ 58 ہزار 224 کینٹین آپریٹرز کو تربیت دی گئی ہے ۔
