ممبئی: بمبئی ہائی کورٹ نے خصوصی تحقیقاتی ٹیم سے بدلاپور اسکول جنسی ہراسانی کیس کی تحقیقات میں دو ملزم ٹرسٹیوں کو گرفتار نہ کرنے پر ناراضگی کا اظہار کیا۔ جسٹس ریوتی موہتے ڈیرے اور پرتھوی راج چوان کی بنچ نے سوال کیا کہ پولیس، جو عموما کسی بھی حد تک ملزم کو پکڑنے جاتی ہے، اس معاملے میں انہیں گرفتار کرنے سے کیسے قاصر ہے۔ عدالت نے اگست میں کیس کا ازخود نوٹس لیا تھا۔ تھانے ضلع بدلاپور قصبے کے ایک اسکول میں چار اور پانچ سال کی دو لڑکیوں کو ایک مرد ملازم نے جنسی زیادتی کا نشانہ بنایا۔ ملزم اکشے شندے کو گرفتار کیا گیا تھا اور 23 ستمبر کو ایک انکاؤنٹر میں پولیس کی گولی سے مارا گیا تھا۔ مہاراشٹر حکومت نے اگست میں کہا تھا کہ انسپکٹر جنرل آف پولیس لیول کے افسر کی قیادت میں ایک ایس آئی ٹی اس واقعے کی تحقیقات کرے گی۔ اسکول کے دو ٹرسٹیز صدر اور سیکرٹری کے نام بھی کیس میں ملزم کے طور پر سامنے آئے۔
