لوگو متعارف‘ 14 جنوری سے شروع ہو نے والی یاترا کے لیے ہم خیال جماعتیں مدعو
نئی دہلی: کانگریس صدر ملکارجن کھرگے نے آج پارٹی کے دہلی میںواقع صدر دفتر پر ’بھارت جوڑو نیائے یاترا‘ کا لوگو متعارف کرا دیا۔ انہوں نے اطلاع دی کہ راہول گاندھی کی قیادت میں پارٹی لیڈران 14 جنوری سے ’بھارت جوڑو نیائے یاترا‘ کا آغاز کر رہے ہیں۔ یاترا سے جڑنے کیلئے انڈیا اتحاد کے قائدین، کانگریس کی حلیف جماعتوں اور سول سوسائٹی کو بھی دعوت دی گئی ہے۔بھارت جوڑو نیائے یاترا کے تعلق سے راہول گاندھی نے کہا کہ ہم پھر تشریف لا رہے ہیں، اپنوں کے درمیان، ناانصافی اور تکبر کے خلاف نیائے (انصاف) کی للکار لے کر۔ سچائی کی اس راہ پر میں حلف لیتا ہوں کہ یاترا جاری رہے گی انصاف کا حق حاصل ہونے تک۔دریں اثنا، کانگریس صدر ملکارجن کھرگے نے کہا کہ 14 جنوری سے منی پور سے ممبئی تک ’بھارت جوڑو نیائے یاترا‘ شروع کی جا رہی ہے۔ اس دوران ہم عوام کے مسائل پر بات کریں گے اور یہ یاترا ملک کے عوام کو معاشی، سماجی اور سیاسی انصاف دلانے کی جانب ہمارا ایک مضبوط قدم ہے۔ یاترا ملک کے سماجی، معاشی، سیاسی اور بنیادی مسائل پر نکالی جا رہی ہے۔کانگریس صدر نے کہا کہ یہ یاترا مودی حکومت کی نانصافیوں کے خلاف آواز ہے ۔ انہوں نے کہا کہ جب ہم نے پارلیمنٹ میں ملک سے وابستہ مسائل اٹھانے کی کوشش کی تو حکومت نے ہمیں بولنے کی اجازت نہیں دی۔ ملک کی تاریخ میں پہلی مرتبہ ایسا واقعہ پیش آیا، جب 146 ارکان پارلیمنٹ کو معطل کر دیا گیا۔ اس لئے ہم ’بھارت جوڑو نیائے یاترا‘ کے ذریعے لوگوں کے درمیان جا رہے ہیں۔کانگریس صدر نے کہا کہ ہم مہنگائی، بے روزگاری، کسانوں کے مسائل، مزدوروں کی بری حالت، امیر غریب کے درمیان بڑھتی کھائی اور ذات پر مبنی مردم شماری سے وابستہ مسائل پر عوام کو بید ار کریں گے۔
یاترا کے دوران راہول سماج کے مختلف طبقات سے، تنظیموں سے بات کریں گے اور ان کے مسائل کے حل پر غور و خوض کریں گے۔ بی جے پی حکومت سرعام ای ڈی، سی بی آئی، آئی ٹی کا استعمال کر کے اپوزیشن کو ڈرانے دھمکانے کا کام کر رہی ہے۔ یہ لوگ جب اپوزیشن کے لوگوں کو پکڑتے ہیں، تو ان کے اوپر کوئی بھی کیس تھوپ دیتے ہیں۔ لیکن جیسے ہی وہ آدمی بی جے پی میں شامل ہوتا ہے، اس کی شبیہ بے داغ ہو جاتی ہے۔ آخر یہ کہاں کا انصاف ہے!کانگریس صدر نے کہا کہ ہم نے ’بھارت جوڑو نیائے یاترا‘ سے جڑنے کے لیے انڈیا اتحاد کے لیڈران، مختلف ریاستوں میں کانگریس کی حلیف جماعتوں اور سول سوسائٹی کو مدعو کیا ہے۔ یاترا کے دوران ان تمام لوگوں سے ملاقات ہوگی اور تبادلہ خیال کیا جائے گا۔کانگریس صدر کا کہنا تھا کہ بھارت جوڑو نیائے یاترا کا پلیٹ فارم این جی او، صحافیوں، کسانوں، چھوٹے کاروباریوں، دلت پسماندہ طبقہ، قبائیلیوں اور دانشور طبقہ کو جوڑنے کے لیے بھی ہے۔ یہ یاترا صرف اپنی بات عوام تک پہنچانے کیلئے ہی نہیں بلکہ عوام کی آواز اور ان کے مسائل کو سننے کا بھی پلیٹ فارم ہے۔ ناانصافی کے خلاف انصاف کی لڑائی میں ہم پھر آ رہے ہیں۔ کروڑوں ملک کے باشندگان کی محبت اور دعائیں ساتھ لے کر، آمریت اور تکبر کو کرارا جواب دینے، اپنے حقوق کیلئے آواز اٹھایئے، اس یاترا میں ہمارے ساتھ جڑیئے۔