ریاض ۔ 26 ستمبر (ایجنسیز) سعودی عرب کے فوجی ترجمان میجر جنرل ترکی المالکی نے ہفتے کی صبح دعویٰ کیا کہ یمن میں ایران نواز حوثی باغیوں کی جانب سے داغا گیا ایک بیلسٹک میزائل فضا ہی میں تباہ کر دیا گیا۔ ان کے مطابق میزائل جنوب مغربی سعودی شہر خمیس مشیط کی جانب فائر کیا گیا تھا، جہاں سعودی فضائیہ کا ایک اہم فوجی اڈہ بھی واقع ہے۔ المالکی نے کہا کہ سعودی فضائی دفاعی نظام نے میزائل کا بروقت سراغ لگا کر اسے اپنے ہدف تک پہنچنے سے پہلے ہی ناکارہ بنا دیا۔ سعودی حکام کے مطابق حملے میں کسی جانی یا مالی نقصان کی اطلاع نہیں ملی۔ خبر رساں ادارے اسوسی ایٹیڈ پریس فوری طور پر اس دعوے کی آزادانہ تصدیق نہیں کر سکا۔ واقعہ کی ذمہ داری قبول کرنے سے متعلق بھی فوری طور پر کوئی بیان سامنے نہیں آیا، اگرچہ ایران نواز حوثی باغی اکثر ایسے حملوں کی ذمہ داری لینے میں کئی دن لگا دیتے ہیں۔ یہ واقعہ ایسے وقت میں پیش آیا ہے جب خطہ میں ایران، امریکہ اور اسرائیل سے متعلق بڑھتی ہوئی کشیدگی کے باعث سلامتی کے خدشات میں اضافہ ہو رہا ہے۔ مبصرین کے مطابق یمن سے سعودی عرب پر میزائل اور ڈرون حملوں کا خطرہ اگرچہ ماضی کے مقابلے میں کم ہوا ہے، تاہم حالیہ واقعہ اس بات کی یاد دہانی ہے کہ تنازع اب بھی مکمل طور پر ختم نہیں ہوا۔
