سہارنپور، 9 ستمبر (یو این آئی) سہارنپور کلکٹریٹ احاطے میں واقع 100 سال سے زیادہ پرانی مسجد کو 5 ستمبر کو پولیس کے ذریعہ منہدم کرنے کے سلسلے میں مسجد کے متولی تنویر احمد کی طرف سے الہ آباد ہائی کورٹ میں ایک عرضی دائر کی گئی ہے ۔ درخواست میں انتظامی کارروائی اور اختیار کردہ طریقہ کار پر سوال اٹھائے گئے ہیں۔ مسجد متولی کی جانب سے ایڈووکیٹ بابر وسیم نے درخواست دائر کی۔ انہوں نے بدھ کو کہا کہ ریاستی حکومت اور ضلع انتظامیہ کو درخواست میں فریق بنایا گیا ہے ۔ وکیل کے مطابق سٹی مجسٹریٹ کلدیپ سنگھ نے 16 جولائی 2026 کو ایک حکم جاری کرتے ہوئے مسجد کو سرکاری زمین پر تعمیر کرنے کا اعلان کیا۔ مسجد کے منتظمین نے اس حکم کے خلاف ڈسٹرکٹ کورٹ میں اپیل کی۔ ڈسٹرکٹ جج نے 2 ستمبر کو سٹی مجسٹریٹ کے حکم کو برقرار رکھا۔ اس کے بعد 5 ستمبر کی صبح انتظامیہ نے بلڈوزر سے مسجد کو منہدم کر دیا۔ وسیم نے کہا کہ پٹیشن پبلک پریمیسز (غیر مجاز قابضین کی بے دخلی) ایکٹ کے تحت کی گئی کارروائی کو چیلنج کرتی ہے ، جسے پی پی ایکٹ بھی کہا جاتا ہے ۔ ان کا استدلال ہے کہ اس قانون کے تحت، انتظامیہ کو کارروائی کرنے سے پہلے زیر بحث جائیداد پر اپنے مالکانہ حقوق کو ثابت کرنے کی ضرورت تھی۔
