بغداد، 15 اپریل (سیاست ڈاٹ کام) عراق میں صوبہ دیالہ کے مشرقی حصے میں گزشتہ روز سیکورٹی فورسز نے دہشت گرد تنظیم دولت اسلامیہ کے ایک رہنما سمیت اس کے تین ساتھیوں کو مار گرایا۔ کاؤنٹر ٹیرر سروس نے ایک بیان میں بتایا کہ انٹیلی جنس رپورٹ کی بنیاد پر آپریشن چلاتے ہوئے صوبہ دیالہ کے پہاڑی علاقے حمرین میں سیکورٹی فورسز نے فضائی حملے کیے تھے جس میں آئی ایس کا فوجی رہنما محمد سلمان داؤد سمیت اس کے تین ساتھیوں کی موت ہو گئی تھی۔یہ کارروائی حمرین میں آئی ایس کے ٹھکانوں کو تباہ کرنے کیلئے بڑے پیمانے پر کی جا رہی ہے۔ قابل ذکر ہیکہ سال 2017 کے آخر میں سیکورٹی فورسز نے پورے ملک سے آئی ایس دہشت گردوں کو نکال باہر کیا تھا جسکے بعد عراق میں سیکورٹی صورتحال بہتر ہوئی ہے ۔ اگرچہ دہشت گرد اکثر سیکورٹی فورسز اور شہریوں پر چھپ چھپ حملہ کرتے رہتے ہیں۔
