تروننتاپورم۔5اکتوبر( ایجنسیز ) زہریلے کف سیرپ ’کولڈرف ‘کے استعمال سے بچوں کی اموات کے بعد ملک بھر میں تشویش کی لہر دوڑ گئی ہے۔ مدھیہ پردیش کے ضلع چھندواڑا میں 11 اور راجستھان میں 3 بچوں کی موت کے بعد تحقیقات میں یہ بات سامنے آئی ہے کہ متاثرہ بچوں کو کولڈرف کف سیرپ دیا گیا تھاجو ٹاملناڈوو کی کمپنی شریسن فارماسیوٹیکل تیار کرتی ہے۔مرکزی ادویہ معیار کنٹرول تنظیم نے اس معاملے کو سنگین قرار دیتے ہوئے ٹاملناڈو فوڈ اینڈ ڈرگ ایڈمنسٹریشن کو کمپنی کے خلاف سخت کارروائی کی ہدایت دی ہے۔ مرکزی صحت سکریٹری نے تمام ریاستوں اور مرکز کے زیر انتظام علاقوں کے اعلیٰ حکام کے ساتھ ویڈیو کانفرنس کر دوا کے معیارات اور کَف سیرپ کے استعمال پر تبادلہ خیال کا فیصلہ کیا ہے۔
