نئی دہلی، 12 اکتوبر (یو این آئی) ملک بھر کے پنشن یافتگان 13 اکتوبر کو یہاں ایمپلائز پراویڈنٹ فنڈ آرگنائزیشن (ای پی ایف او) کے ہیڈکوارٹر پر احتجاج کریں گے ۔ ای پی ایس-95 راشٹریہ سنگھرش سمیتی نے اتوار کو یہ اعلان کیا۔ کمیٹی کی طرف سے جاری ریلیز کے مطابق حکومت نے سنٹرل بورڈ آف ٹرسٹیز کی میٹنگ جو پہلے بنگلور میں منعقد ہونے والی تھی، اسے دہلی منتقل کر دیا ہے ، جس سے پنشن یافتگان میں مزید بے اطمینانی بڑھ رہی ہے ۔ کمیٹی کے مطابق کم از کم 7500 روپے ماہانہ پنشن کا مطالبہ طویل عرصے سے زیر التواء ہے ۔ پنشن یافتگان نے ڈی اے (مہنگائی بھتہ) کی مکمل ادائیگی، سپریم کورٹ کے فیصلے کے مطابق پنشن میں اضافے اور مناسب طبی سہولیات کا مطالبہ کیا ہے ۔ حکومت کی جانب سے اس معاملے پر کوئی ٹھوس قدم نہ اٹھانے سے پنشن یافتگان میں ناراضگی بڑھ رہی ہے ۔ گزشتہ ایک ماہ سے ملک بھر میں ای پی ایف او اور ڈسٹرکٹ مجسٹریٹ کے دفاتر کے باہر احتجاج ہو رہا ہے لیکن حکومت کی طرف سے کوئی جواب نہیں آیا ہے ۔ کمیٹی کے قومی صدر کمانڈر اشوک راوت نے کہا کہ حکومت نے اجلاس کا مقام تبدیل کر کے ہمارے غصے سے بچنے کی کوشش کی ہے ۔
۔لیکن اب پنشن یافتگان پیچھے نہیں ہٹیں گے ۔ کم از کم پنشن 7500 روپے ، ڈی اے کی مکمل ادائیگی، سپریم کورٹ کے حکم کے مطابق پنشن میں اضافہ، اور طبی سہولیات کے نفاذ تک احتجاج جاری رہے گا۔انہوں نے کہا کہ دہلی، ہریانہ، پنجاب، اتر پردیش، اتراکھنڈ، راجستھان اور مدھیہ پردیش سے بڑی تعداد میں پنشن یافتگان دہلی پہنچیں گے اور اپنے مطالبات پر وزیر محنت اور سی بی ٹی کے ممبران سے جواب طلب کریں گے ۔ کمیٹی نے خبردار کیا ہے کہ دیوالی تک ان کے مطالبات تسلیم نہ کیے گئے تو تحریک کو مزید وسعت دی جائے گی۔