میکسیکو سٹی، یکم جولائی(یواین آئی) میزبان میکسیکو نے فیفا ورلڈکپ 2026کے راؤنڈ آف 32 کے مقابلے میں ایکواڈورکو 2-0 سے شکست دے کر ورلڈکپ کے ناک آؤٹ مرحلے میں 40 برس بعد پہلی کامیابی حاصل کرتے ہوئے پری کوارٹر فائنل (راؤنڈ آف 16) میں جگہ بنا لی۔ایستادیو بانوورٹے اسٹیڈیم میں چہارشنبہ کو 80,824 شائقین کی موجودگی میں کھیلے گئے اس مقابلے میں میکسیکو نے ابتدائی دباؤ سے سنبھلتے ہوئے پہلے ہاف میں جولین کوئینونیس اور راؤل جیمنیزکے گولس کی بدولت2-0 کی برتری حاصل کی، جسے مضبوط دفاع کی مدد سے آخر تک برقرار رکھا۔میزبان ٹیم نے آغاز میں کئی اچھے مواقع بنائے ، لیکن انہیں گول میں تبدیل نہ کر سکی۔ دوسری جانب ایکواڈورکے جان یبوآ نے قریب سے گول کرنے کی کوشش کی، تاہم وہ کامیاب نہ ہو سکے ، جس سے میکسیکو کو ابتدائی خطرے کا احساس ہوا۔ 22 ویں منٹ میں میکسیکو نے موقع سے فائدہ اٹھاتے ہوئے جولین کوئینونیس کے شاندار گول کی بدولت برتری حاصل کی۔ اس کے نو منٹ بعد راؤل خیمنیز نے خوبصورت اشتراک سے دوسرا گول کرکے اپنی ٹیم کی برتری 2-0 کردی۔دوسرے ہاف میں ایکواڈور نے واپسی کی کوشش کی، لیکن میکسیکو کے منظم دفاع اورگول کیپر راؤل کے سامنے اسے کامیابی نہ مل سکی۔ متبادل کھلاڑی مائیکل ایسٹراڈا روڈریگیز کو گول کرنے کا بہترین موقع ملا، مگر وہ بھی اسے ضائع کر بیٹھے ۔ میکسیکو نے جوابی حملوں کے ذریعہ مسلسل دباؤ برقرار رکھا۔ سیزر مونتیس کے ہیڈرکو ایکواڈورکے گول کیپر ہیرنان گالینڈیز نے شاندار انداز میں بچایا، جبکہ انجری ٹائم میں اوربیلین پینیڈا کا کَرلنگ شاٹ معمولی فرق سے باہر چلا گیا۔ میچ کے اختتامی لمحات میں کشیدگی بڑھ گئی اور وی اے آر جائزے کے بعد ایکواڈورکے دفاعی کھلاڑی پیئرو ہنکاپی کو انجری ٹائم کے پانچویں منٹ میں براہِ راست ریڈ کارڈ دکھایا گیا۔ اس مقابلے میں کینڈری پائز اور موئسیس کائیسیڈو کو بھی یلو کارڈ ملا۔اس کامیابی کے ساتھ شریک میزبان میکسیکو راؤنڈ آف16 میں پہنچ گیا، جہاں اس کا مقابلہ انگلینڈ اور ڈی آرکانگو کے درمیان ہونے والے میچ کے فاتح سے ہوگا، جبکہ ایکواڈور20 برس بعد ورلڈکپ کے ناک آؤٹ مرحلے میں پہنچنے کے باوجود ٹورنامنٹ سے باہر ہو گیا۔
