نئی دہلی : ٹویٹر نے بالی وڈ اداکارہ کنگنا راناوت کا ٹویٹر اکاؤنٹ مستقل طور پر معطل کر دیا ہے ۔ ٹویٹر نے مغربی بنگال کے اسمبلی انتخابات کے نتائج کے بعد ریاست میں تشدد کے واقعات سے متعلق کنگنا کے اس متنازعہ ٹویٹ کے تناظر میں یہ کاروائی کی ہے جسے ریاست کی وزیراعلیٰ ممتا بنرجی کے لیے کافی قابل اعتراض اور سیاست سے متاثر مانا گیا۔ کنگنا نے ٹویٹ کرکے کہا: ’’یہ خوفناک ہے ۔ ہمیں غنڈئی کو مارنے کے لیے سوپرغنڈئی چاہیے ۔ وہ تاڑکا کی طرح ہے ۔ مودی جی 2000 ء کے آغاز والے اپنے ’وراٹ روپ‘ کو دکھاؤ!‘‘۔ انہوں نے بنگال میں صدر راج ہیش ٹیگ بھی کیا۔ ٹویٹر نے اپنے بیان میں کہا کہ کنگنا راناوت مسلسل ’ہیٹ فل کنڈکٹ پالیسی‘ کی خلاف ورزی کر رہی تھیں لہٰذا ان کا اکاؤنٹ اب ہمیشہ کے لیے معطل کر دیا گیا ہے ۔
