ممبئی، یکم ستمبر (آئی اے این ایس) اداکارہ مونالیسا نے اپنی نئی پیشکش ’چارودت کی وسنت سینا‘ میں طوائف کا کردار ادا کرنے پر 1984 کی فلم ’اتسو‘ میں ریکھا کے مشہور کردار سے ہونے والے موازنے پر ردعمل ظاہرکیا ہے۔دونوں کرداروں میں مماثلت کے حوالے سے بات کرتے ہوئے مونالیسا نے ریکھا کے عظیم مقام کا اعتراف کیا اور کہا کہ ان کے خیال میں دونوں اداکاراؤں کی اداکاری کا کوئی موازنہ نہیں کیا جاسکتا۔ خصوصی گفتگو میں مونالیسا نے کہا کہ وہ خود کو خوش قسمت سمجھتی ہیں کہ انہیں اس نوعیت کا کردار ادا کرنے کا موقع ملا۔ انہوں نے کہا کہ اگر وہ ریکھا کی اداکاری کا معمولی سا حصہ بھی اپنے کردار میں پیش کرنے میں کامیاب ہوئیں تو یہ ان کے لیے خوش قسمتی ہوگی۔’نظر‘ کی اداکارہ مونالیسا نے کہا وہ ایک لیجنڈ ہیں۔ ان کے ساتھ بالکل کوئی موازنہ نہیں ہوسکتا۔ میں صرف خود کو خوش قسمت سمجھتی ہوں کہ مجھے اس طرح کا کردار ادا کرنے کا موقع ملا۔ اگر میں بھی اس کردار میں ان کی اداکاری کا معمولی سا حصہ پیش کرسکی تو میں خود کو خوش قسمت سمجھوں گی۔ ہم نے اپنی پوری کوشش کی ہے۔ یہ حقیقت کہ اس طرح کے کردار کو ایک مائیکرو ڈراما سیریز کے لیے تصور کیا گیا، بہت دلچسپ ہے۔ میں کے یو کے یو ٹی وی کا شکریہ ادا کرنا چاہوں گی کہ اس نے مجھے یہ موقع دیا، کیونکہ یہ میرے کیریئر میں یقینی طور پر ایک نئی سطح ہے۔ ہرکوئی مجھے اس کردار میں پسند کر رہا ہے اور دیکھ رہا ہے۔ میں لوگوں کو یہ دکھانے میں کامیاب ہوئی ہوں کہ میں اس طرح کا کردار بھی ادا کرسکتی ہوں اور یہ احساس میرے لیے بہت اچھا ہے۔مونالیسا کے یو کے یو ٹی وی کی پیریڈ مائیکرو ڈراما سیریز ’چارودت کی وسنت سینا‘ میں مرکزی کردار وسنت سینا ادا کر رہی ہیں۔ وسنت سینا ایک طوائف کا کردار ہے۔1984 میں ریلیز ہونے والی فلم ’اتسو‘ میں ریکھا نے وسنت سینا کا کردار ادا کیا تھا، جو ایک دولت مند، پراعتماد اور معروف طوائف کے طور پر دکھایا گیا تھا۔فلم ’اتسو‘ میں ششی کپور، ریکھا، امجد خان، شنکر ناگ، شیکھر سمن، انورادھا پٹیل، انوپم کھیر، نینا گپتا، کلبھوشن کھر بندہ، انو کپور سمیت دیگر فنکارتھے۔
