محبوب نگر ۔ یکم اگسٹ ۔ ( سیاست ڈسٹرکٹ نیوز ) یکم سے 7 اگست تک ورلڈ بریسٹ فیڈنگ ویک2026 کے موقع پر منعقد کیے جانے والے پروگراموں کے ایک حصے کے طور پر ہفتہ کو محبوب نگر کے ضلع ہیڈکوارٹر میں واقع سرکاری جنرل اسپتال میں ماں کے دودھ کی اہمیت کے بارے میں ایک بیداری پروگرام کا انعقاد کیا گیا۔ اس پروگرام میں ضلع کلکٹر خوشبو گپتا نے بطور مہمان خصوصی شرکت کی اور خطاب کیا۔اس موقع پر انھوں نے کہا کہ ماں کا دودھ نوزائیدہ بچے کی صحت مند نشوونما کے لیے مکمل غذائیت ہے۔ انہوں نے کہا کہ اگر بچہ پیدائش کے پہلے گھنٹے کے اندر دودھ پینا شروع کر دے تو قوت مدافعت بڑھ جاتی ہے اور وہ کئی انفیکشن سے محفوظ رہتا ہے۔ انہوں نے مشورہ دیا کہ بچے کو پیدائش کے بعد پہلے چھ ماہ تک صرف ماں کا دودھ پلایا جائے اور پھر دو سال یا اس سے زیادہ عمر کے لیے مناسب غذائیت کے ساتھ دودھ پلایا جائے۔ انہوں نے کہا کہ ماں اور بچوں کی صحت کی دیکھ بھال میں ماں کا دودھ بہت اہم ہے اور ایک صحت مند معاشرے کی تعمیر کے لیے بریسٹ فیڈنگ کو فروغ دینا بہت ضروری ہے۔ قبل ازیں ضلع کلکٹر نے ورلڈ بریسٹ فیڈنگ ویک کے موقع پر سرکاری جنرل ہسپتال میں منعقدہ بیداری ریلی میں شرکت کی۔ اس ریلی میں ماؤں، ڈاکٹروں، میڈیکل سٹوڈنٹس، نرسنگ کے طالب علموں اور ہیلتھ ورکرز نے جوش و خروش سے پلے کارڈز اور نعروں کے ساتھ حصہ لیا جس میں ماں کا دودھ پلانے کی اہمیت بتائی گئی۔اس پروگرام میں ڈاکٹر رنگا اجمیرا، ڈسٹرکٹ میڈیکل اینڈ ہیلتھ ڈپارٹمنٹ آفیسر اے سرینواس، ڈسٹرکٹ ویلفیئر آفیسر زرینہ، ڈاکٹرس، نرسنگ اسٹاف، میڈیکل طلباء، عہدیداروں اور دیگر نے شرکت کی۔
