سدی پیٹ۔ 16ستمبر ۔ (سیاست ڈسٹرکٹ نیوز ) سدی پیٹ قصبے کے پلّور پرائمری ہیلتھ سینٹر کے تحت مٹ پلی سب سینٹر کا ضلع طبی و محکمہ صحت افسر ڈاکٹر سی ایچ دھنراج نے اچانک معائنہ کیا۔ اس موقع پر انہوں نے صحت مرکز میں جاری حفاظتی ٹیکوں کے پروگرام کی کارکردگی کا جائزہ لیا۔بعد ازاں وہاں آئی ہوئی خواتین سے بات چیت کرتے ہوئے حفاظتی ٹیکوں کی اہمیت کے بارے میں بتایا۔ حاملہ خواتین کو دیے جانے والے ٹیکے، بچوں کی نشوونما، اور حاملہ خواتین اور چھوٹے بچوں کے لیے ضروری غذائیت کے بارے میں آگاہی فراہم کی۔اس کے بعد عملے سے بات کرتے ہوئے انہوں نے ہدایت دی کہ اہل بچوں، حاملہ خواتین کو حفاظتی ٹیکے اور 14 سال کی عمر کی بچیوں کو رحم کے کینسر سے بچاؤ کے لیے HPV ٹیکے سو فیصد فراہم کرنے کے لیے اقدامات کیے جائیں۔ انہوں نے مشورہ دیا کہ فیلڈ سطح پر کام کرنے والی آشا کارکنان ڈیو لسٹ کے مطابق بچوں کو صحت مرکز پر لا کر ٹیکے لگوائیں۔انہوں نے تمام قومی صحت پروگراموں کو موثر طریقے سے نافذ کرنے، ادویات دستیاب رکھنے اور وقت کی پابندی پر عمل کرنے کا مشورہ دیا۔ انہوں نے خبردار کیا کہ فرائض میں غفلت برتنے والوں کے خلاف تادیبی کارروائی کی جائے گی۔ اس پروگرام میں اے این ایم جیا، ایچ اے ناگیندر ریڈی، آشا کارکنان رانی، ساروا، یادمّا نے شرکت کی۔
