محمد شفیع مرزا انجم حیدرآبادی
قطعہ
سراپا اس کا کچھ ایسا دکھائی دیتا ہے
بڑا عجیب سا نقشہ دکھائی دیتا ہے
سلیم کہتے ہیں دنیا کے سارے لوگ جسے
مگر قریب سے سلمہ دکھائی دیتا ہے
………………………
ڈاکٹر سید خورشید علی ساجد
غزل (طنز و مزاح)
لطف پاتے ہیں منجدھاروں سے
ہم تو گھبرا گئے کناروں سے
ہم یاں سمجھیں تو کہئے کیا سمجھیں
باتیں ہوتی ہیں بس اشاروں سے
قدر کیا گلشنوں کی کوّے کو
بلبل ہے آشنا بہاروں سے
آہ اب کیا حیات ہے دیکھو
اب تو چلتے ہیں وہ سہاروں سے
جام جم سے سفالی جام اچھا
ٹوٹا لائے نیا کمہاروں سے
لطف ساجدؔ اُٹھائیں گے آؤ
سبزہ زاروں سے آبشاروں سے
…………………………
مفت میں …!!
٭ دندان ساز سے ایک شخص نے پوچھا۔ سامنے کے دانت نکالنے کے کی آپ کتنی فیس لیں گے…؟
ڈاکٹر: پچیس روپئے…!!
اور داڑھ نکالنے کے لیے؟ مریض بولا
دندان ساز نے جواب دیا بیس روپئے۔
مریض: کیا کچھ رعایت نہیں کرسکتے؟
دندان ساز: چلیے آپ پانچ روپے کم دیجئے گا۔
مریض: نہیں جناب یہ رعایت کافی نہیں۔
دندان ساز نے جل کر کہا: تو پھر کسی سے لڑ کر مفت میں پوری بتیسی نکلوالو۔
ابن القمرین ۔ مکتھل
………………………
اجازت کی ضرورت نہیں !
پہلا دوست : ایسا لگتا ہے کہ تم نے تمہاری بیوی کو کھلی اجازت دیدی ہے کہ وہ اپنی مان مانی کرے …!
دوسرا دوست : اُسے اجازت دینے کی ضرورت کیا ہے ؟ وہ میری اجازت کے بغیر بھی من مانی کرتی ہے …!!
مظہر قادری ۔ حیدرآباد
………………………
نئی بیماری …!
٭ دو لڑکپن کے سہیلیوں کی کافی عرصہ بعد ملاقات ہوئی ، دوران ملاقات ایک سہیلی نے دوسری سے کہا: کھانا سامنے رکھا ہوتا ہے ، بھوک نہیں لگتی ، نیند آتے رہتی ہے لیکن سو نہیں پاتی ہوں ، کرنا کچھ چاہتی ہوں ، ہو کچھ اور ہی جاتا ہے ۔ پتہ نہیں کونسا روگ (بیماری) ہوگیا ہے مجھے ؟
دوسری سہیلی : ’’وہی ، جو تم نے اپنے ہاتھ میں پکڑ رکھا ہے ،موبائیل !‘‘
مبشر سید ۔ چنچلگوڑہ
………………………
ترکیب !
٭ کسی زمانے میں ایک بادشاہ اپنی رعایا پر بہت ظلم کرتا تھا ، اس کی حکومت میں سب پریشان تھے ۔ ایک دن بادشاہ نے وزیر سے کہاکہ لوگ مجھ سے ناراض ہیں انھیں خوش کرنے کے لئے میں نے ایک ترکیب سوچی ہے کہ میں ہوائی جہاز پر بیٹھ کر سو سو (100 )روپئے کے نوٹ پھینکوں تاکہ لوگ خوش ہوجائیں ۔
وزیر نے جواب دیا ’’نہیں ‘‘ ۔
پھر بادشاہ نے پوچھا ۔ اچھا اگر میں ہوائی جہاز سے سونا چاندی پھینکوں تو کیا لوگ خوش ہوجائیں گے ؟
وزیر نے جواب دیا ’’نہیں ‘‘ ۔ تو بادشاہ نے پوچھا آخر رعایا کو خوش کرنے کا کیا طریقہ ہے ؟ وزیر نے یہ سن کر جواب دیا ۔ جہاں پناہ گستاخی معاف ! میرا ناچیز مشورہ یہ ہے کہ ہوائی جہاز سے آپ خود ہی کود جائیں!
شعیب علی فیصل ۔ محبوب نگر
…………………………
یوگا کا فائدہ …!!
٭ ایک عادی شرابی کو کسی نے مشورہ دیا کہ وہ یوگا کی مشق کرے ۔ اس طرح شراب چھوڑنے میں آسانی رہے گی ۔ دس ماہ کی طویل اور صبرآزما مشقت کے بعد وہ آدمی یوگا میں ماہر ہوگیا ۔
کسی نے اس کی بیوی سے پوچھا : ’’کیا یوگا کی مشقوں سے کوئی فائدہ ہوا ہے …؟‘‘
’’جی ہاں …!‘‘ بیوی بولی ۔ ’’اب وہ سر کے بل کھڑے ہوکر شراب پی سکتا ہے ‘‘۔
نظیر سہروردی ۔راجیونگر، حیدرآباد
………………………
