اسلام آباد، 20 جون (سیاست ڈاٹ کام) پاکستان کے عام بجٹ کے سلسلہ میں عمران خان حکومت اپوزیشن کے نشانے پر ہے ۔ نیشنل اسمبلی میں حزب اختلاف کے رہنما اور پاکستان مسلم لیگ نواز (ن)کے رہنما شہباز شریف نے بجٹ کو مسترد کرتے ہوئے اسے واپس لینے کا مطالبہ کیا ہے۔ نیشنل اسمبلی میں بجٹ بحث میں حصہ لیتے ہوئے حزب اختلاف کے رہنما نے اسے ‘عوام مخالف’ اور بین الاقوامی مالیاتی فنڈ (آئی ایم ایف) کی ہدایات پر بنایا گیا قرار دیا ہے ۔گزشتہ سال اقتدار میں عمران خان کی قیادت میں آئی پاکستان تحریک انصاف (پی ٹی آئی) نے 11 جون کو بجٹ پیش کیا تھا۔حزب اختلاف کے رہنما نے چہارشنبہ کو قومی اسمبلی میں دعوی کیا کہ بجٹ آئی ایم ایف نے تیار کیا ہے اور یہ عام لوگوں اور کسانوں کی زندگی پر لٹکتی تلوار ہے ۔ حکومت پر تنقید کرتے ہوئے مسٹر شہباز نے کہا کہ اقتدار میں آنے پر مسٹر خان نے نیا پاکستان بنانے کے بڑے بڑے دعوے کئے تھے لیکن ملک کی معیشت کو آگے لے جانے کی بجائے آدھے ادھورے اقدامات سے اسے بدترین حالت میں پہنچا دیا ہے ۔
