نئی دہلی 10اکتوبر (یو این آئی) مغربی بنگال میں مبینہ میونسپلٹی بھرتی گھپلے کی تحقیقات کے سلسلے میں انفورسمنٹ ڈائریکٹوریٹ (ای ڈی) نے جمعہ کے روز ریاست بھر میں 11 مقامات پر بیک وقت چھاپے مارے ۔ یہ کارروائی ریاست کے فائر اینڈ ایمرجنسی سروسز کے وزیر اور ترنمول کانگریس کے رکنِ اسمبلی سجیت بوس سے منسلک مقامات سمیت کئی جگہوں پر جاری ہے ۔ ای ڈی کے ذرائع کے مطابق تلاشی مہم کولکاتہ اور اس کے آس پاس کے علاقوں میں چلائی جا رہی ہے ۔ جن مقامات پر چھاپے مارے گئے ہیں، ان میں سجیت بوس کا سرکاری و نجی دفتر، ان سے وابستہ کمپنیوں کے دفاتر اور قریبی ساتھیوں کے گھروں شامل ہیں۔ یہ معاملہ اُس میونسپلٹی بھرتی گھپلے سے متعلق ہے جس کی تحقیقات سی بی آئی کی ایف آئی آر کی بنیاد پر شروع کی گئی تھی۔ کولکاتہ ہائی کورٹ کے حکم پر درج اس ایف آئی آر میں الزام عائد کیا گیا تھا کہ ریاست میں بھرتی گھپلہ صرف اساتذہ کی تقرریوں تک محدود نہیں بلکہ مختلف بلدیاتی اداروں میں غیر قانونی بھرتیوں تک پھیلا ہوا ہے ۔ قابلِ ذکر ہے کہ اس سے قبل بھی ای ڈی نے اسی معاملے میں وزیر سجیت بوس اور ریاست کے خوراک اور سپلائی کے وزیر رتن گھوش کے رہائشی مقامات پر چھاپے مارے تھے ۔ ای ڈی حکام نے بتایا کہ تلاشی کے دوران کچھ مالیاتی دستاویزات اور ڈیجیٹل ریکارڈ ضبط کیے گئے ہیں، جن کی جانچ جاری ہے ۔ مرکزی ایجنسی کو شبہ ہے کہ غیر قانونی بھرتیوں کے بدلے بڑی رقم کا لین دین ہوا تھا۔ ای ڈی کے مطابق یہ کارروائی کالے دھن کو جائز بنانے کی روک تھام سے متعلق قانون کے تحت کی جا رہی ہے ۔
ایجنسی آئندہ دنوں میں متعلقہ حکام اور سیاسی رہنماؤں سے پوچھ تاچھ بھی کر سکتی ہے ۔ مغربی بنگال میں گزشتہ چند مہینوں کے دوران بھرتی گھپلوں کے معاملے میں مرکزی ایجنسیوں نے ریاستی حکومت کے وزیروں اور افسران کے خلاف کئی سخت کارروائیاں کی ہیں۔
