چنئی، 31 مئی (یواین آئی) ہندوستانی خلائی تحقیقاتی ادارہ (اسرو) اب چاند پر مشن کے ساتھ ساتھ خلا میں انسان بھیجنے کی تیاری کر رہا ہے ۔ گگن یان مشن کے تحت ہندوستانی خلاباز خلا میں جائیں گے ۔ اس کے علاوہ نجی شعبے کی شرکت بڑھانے اور نئے لانچ وہیکلز کی ترقی پر بھی زور دیا جا رہا ہے ۔اسرو چندریان، گگن یان اور ہند۔امریکہ نثار مشن سمیت کئی کامیاب لانچز کے ساتھ ساتھ ایکسوم-4 مشن پر ملک کے پہلے خلاباز کو بین الاقوامی خلائی اسٹیشن (آئی ایس ایس) پر بھیجنے کیلئے پرعزم ہے ۔اسرو نے گزشتہ سال کی کامیابیوں کا ذکر کرتے ہوئے اپنی ویب سائٹ پر یہ تازہ ترین معلومات شئیر کی ہیں۔خلائی ایجنسی نے کہا کہ سری ہری کوٹہ کے خلائی مرکز سے پانچ لانچز کامیاب رہے جن میں آٹھ ہندوستانی خلائی جہاز، ایک غیر ملکی سیٹلائٹ اور پی او ای ایم 3 اور 4 سمیت چھ راکٹ باڈیز کا درست لانچ شامل ہے ۔ ان سب نے اپنی مقررہ مدار میں پے لوڈ کو کامیابی سے لانچ کیا۔سال 2024 کی اپنی کامیابیوں کا ذکر کرتے ہوئے اسرو نے بتایا کہ تنظیم کے جی سیٹ20 کو اسپیس ایکس کے فالکن-9 بلاک 5 کے ذریعے کیپ کیناویرل سے لانچ کیا گیا۔ ٹی سیٹ-1اے کو بھی فالکن-9 کے ذریعے لانچ کیا گیا جس کے نتیجے میں کل آٹھ ہندوستانی سیٹلائٹس، ایک غیر ملکی سیٹلائٹ اور چھ راکٹ باڈیز (پی او ای ایم-3 اور پی او ای ایم-4 سمیت) کو ان کی مطلوبہ مداروں میں لانچ کیا گیا۔ویب سائٹ کے مطابق گزشتہ سال 31 دسمبر تک نجی آپریٹرز/تعلیمی اداروں سمیت کل 36 ہندوستانی خلائی جہاز مدار میں لانچ کیے گئے ۔ اس دوران حکومت ہند کے زیر ملکیت آپریشنل سیٹلائٹس کی تعداد ایل ای او (لو ارتھ آربیٹ) میں 22 اور جیو (جیو سنکرونس ارتھ آربیٹ) میں 31 ہے ۔ اسرو ان سیٹلائٹس کا آپریشن اور انتظام کرتا ہے جو ملک کی ترقی اور سلامتی کیلئے اہم کردار ادا کرتے ہیں۔
