یہ صرف ایک جگہ نہیں، مزاحمت کا ایک جذبہ ہے ، ابھیجیت دپکے کا بیان، سی جے پی قائدین کی رہائی کا مطالبہ
نئی دہلی۔ 13 اکتوبر (یو این آئی) کاکروچ جنتا پارٹی (سی جے پی) کے رہنماؤں سوربھ داس، آشوتوش رانکا اور اجنکیہ شندے نے منگل کے روز مبینہ طور پر جنتر منتر میں داخل ہونے اور قومی پرچم لہرانے کی کوشش کی۔ پارٹی کے بانی ابھجیت دپکے نے سوشل میڈیا پلیٹ فارم ایکس پر ایک پوسٹ کے ذریعہ یہ معلومات دی کہ صبح پیش آئے اس واقعہ کے دوران پارٹی کے متعدد اراکین کو پولیس نے حراست میں لے لیا ہے ۔ دپکے نے جنتر منتر کو ایک احتجاجی مقام کے طور پر ختم کرنے کے مرکز کے حکم کو چیلنج کرتے ہوئے ایکس پر لکھا کہ آپ مزاحمت کو فہرست سے باہر نہیں کر سکتے ۔ انہوں نے اس پوسٹ میں وزیر اعظم نریندر مودی کو بھی ٹیگ کیا۔ دپکے نے پولیس کی کارروائی پر سوال اٹھاتے ہوئے کہا کہ ان کی ٹیم نے جنتر منتر جا کر ترنگا لہرایا تھا۔ انہوں نے سوال کیا کہ ترنگا لہرانا کب سے خلاف ورزی بن گیا؟ انہوں نے مطالبہ کیا کہ قومی پرچم لہرانے والے ان رہنماؤں پر کوئی الزامات عائد نہ کیے جائیں۔ دپکے نے پولیس سے یہ بھی التجا کی کہ حراست میں لیے گئے اراکین کو اپنے وکلاء سے مشورہ کرنے کی اجازت دی جائے ۔ انہوں نے الزام لگایا کہ انہیں خود پہلے 24 گھنٹے تک قانونی مشورے کے بغیر حراست میں رکھا گیا تھا۔ انہوں نے کہا کہ پورا ملک جنتر منتر بن جائے گا۔ جنتر منتر صرف ایک جگہ نہیں ہے، یہ مزاحمت کا ایک جذبہ ہے ۔ انہوں نے پولیس کی اس کارروائی کو آمرانہ ذہنیت کی مثال قرار دیتے ہوئے الزام لگایا کہ حکومت احتجاج کے لیے عوامی مقامات کے استعمال کو محدود کرنے کی کوشش کر رہی ہے ۔