گوتم بدھ نگر، اتر پردیش:14 ۔ اگست ( پریس نوٹ ) ۔ ایسوسی ایشن فار پروٹیکشن آف سول رائٹس (اے پی سی آر) نے اسی سال اپریل میں نوئیڈا اور اس کے اطراف کی کمپنیوں میں کام کرنے والے مزدوروں کے احتجاج سے پیدا ہونے والے ایک مقدمے میں قانونی مداخلت کرتے ہوئے ملزمان کے لیے ضمانت حاصل کرلی ہے۔ مذکورہ احتجاج میں مزدوروں نے کم از کم اجرت، اوور ٹائم کی ادائیگی، بہتر اجرت اور کام کے سازگار و محفوظ حالات سمیت اپنے بنیادی معاشی اور محنت کش حقوق سے متعلق مطالبات اٹھائے تھے۔یہ مقدمہ کرائم نمبر 164/2016 کے تحت پولیس اسٹیشن فیز-2، گوتم بدھ نگر، اتر پردیش میں درج کیا گیا تھا۔ مقدمے میں مختلف دفعات کے تحت کارروائی کی گئی، جن میں بھارتیہ نیائے سنہتا (BNS)، 2023 کی متعلقہ دفعات کے علاوہ Prevention of Damage to Public Property Act, 1984 کی دفعات 3 اور 4 اور Criminal Law (Amendment) Act, 1932 کی دفعہ 7 بھی شامل ہیں۔ملزمان کی جانب سے ضمانت کی درخواست متعلقہ عدالت میں Criminal Misc. Bail Application (BAIL) No. 28243/2026 کے طور پر دائر کی گئی۔ اے پی سی آر کی جانب سے ایڈووکیٹ ارشاد احمد نے عدالت میں مقدمے کی پیروی کی اور دلائل پیش کرتے ہوئے ملزمان کیلئے ضمانت حاصل کرنے میں کامیابی حاصل کی۔یہ معاملہ نوئیڈا اور گریٹر نوئیڈا میں مزدوروں کے احتجاج کے بعد پیدا ہونے والے وسیع تر قانونی معاملات کا حصہ ہے۔ مزدوروں نے اجرت، اوور ٹائم کی ادائیگی، کام کے حالات اور دیگر بنیادی حقوق سے متعلق اپنے مطالبات کے لیے احتجاج کیا تھا۔ احتجاج کے دوران صورتِ حال میں کشیدگی پیدا ہونے کے بعد متعدد افراد کے خلاف فوجداری مقدمات درج کیے گئے، جس کے نتیجے میں کئی مزدور اور دیگر افراد طویل قانونی کارروائی کا سامنا کرنے پر مجبور ہوئے۔اے پی سی آر کے نیشنل سکریٹری ندیم خان نے ضمانت ملنے پر اپنے ردعمل میں کہا ہے کہ مزدوروں کا اپنے جائز مطالبات کے لیے آواز اٹھانا اور قانونی و آئینی دائرے میں اپنے حقوق کا مطالبہ کرنا جمہوری معاشرے کا بنیادی حصہ ہے۔ انہوں نے کہا کہ، کسی بھی فرد کے خلاف فوجداری مقدمہ درج ہونے کی صورت میں اسے منصفانہ قانونی نمائندگی، مؤثر دفاع اور انصاف تک رسائی کا پورا حق حاصل ہے۔ندیم خان نے ایک بار پھر اس عزم کا اظہار کیا ہے کہ اے پی سی آر آئینی حقوق، شہری آزادیوں، قانونی مساوات اور عوام کی پْرامن طور پر اپنی آواز بلند کرنے کی آزادی کے تحفظ کیلئے قانونی امداد فراہم کرتی رہے گی۔ انہوں نے کہا کہ انصاف تک رسائی کسی فرد کی معاشی یا سماجی حیثیت سے مشروط نہیں ہونی چاہیے اور محنت کش طبقے سمیت ہر شہری کو اپنے بنیادی حقوق کے تحفظ کیلئے مؤثر قانونی معاونت دستیاب ہونی چاہیے۔ تنظیم کی جانب سے جاری پریس ریلیز کہا گیا ہے کہ مزدوروں اور دیگر شہریوں کے خلاف درج مقدمات میں قانونی عمل کا مقصد محض کارروائی کرنا نہیں بلکہ انصاف کے تقاضوں کو یقینی بنانا ہونا چاہیے اور اے پی سی آر آئینی ضمانتوں، قانون کی حکمرانی اور شہری آزادیوں کے تحفظ کے لیے اپنی قانونی جدوجہد جاری رکھے گی۔
