آئینی ترمیمی بل میں کیا شامل ہوگا اور کیا نہیں، اس کی وضاحت ہی نہیں ہوئی: جے رام رمیش
نئی دہلی۔ 21 نومبر (یو این آئی) کانگریس کے جنرل سکریٹری اور شعبۂ مواصلات کے انچارج جے رام رمیش نے ہفتہ کے روز نریندر مودی حکومت پر الزام عائد کیا کہ وہ حلقہ بندی سے متعلق آئینی ترمیمی بل منظور کرانے کیلئے درکار اکثریت حاصل کرنے کی کوششوں میں مصروف ہے ، جبکہ ابھی تک یہ بھی واضح نہیں ہے کہ مجوزہ قانون سازی میں کیا کچھ شامل ہوگا۔ انہوں نے کہا کہ اس معاملہ پر سیاسی جماعتوں کے ساتھ کوئی بامعنی مشاورت بھی نہیں کی گئی ہے ۔ انہوں نے حکومت سے مطالبہ کیا کہ لوک سبھا کی موجودہ نشستوں کی تعداد اور ریاستوں کے درمیان نشستوں کی تقسیم میں کوئی تبدیلی کیے بغیر خواتین کیلئے ایک تہائی ریزرویشن نافذ کیا جائے ۔ پارلیمنٹ کے 2026 کے مانسون اجلاس کو غیر معینہ مدت کیلئے ملتوی کیے جانے اور اسے باضابطہ طور پر برخاست نہ کیے جانے کے 100 دن مکمل ہونے کے موقع پر جے رام رمیش نے کہا کہ حکومت اب بھی حلقہ بندی سے متعلق مجوزہ قانون سازی کیلئے دو تہائی اکثریت حاصل کرنے کی کوششوں میں لگی ہوئی ہے ، حالانکہ ملک کو اس وقت اس سے کہیں زیادہ اہم اقتصادی، سیاسی اور قومی چیلنجوں کا سامنا ہے ، جن پر حکومت کو توجہ دینے کی ضرورت ہے ۔ میڈیا کے ساتھ شیئر کی گئی ایک پوسٹ میں جے رام رمیش نے کہاکہ وزیر اعظم اور وزیر داخلہ کی جوڑی اب بھی لوک سبھا میں دو تہائی اکثریت حاصل کرنے کی کوشش کر رہی ہے تاکہ حلقہ بندی سے متعلق آئینی ترمیمی بل منظور کرایا جاسکے ۔ انہوں نے اس بیان میں وزیر اعظم نریندر مودی اور مرکزی وزیر داخلہ امیت شاہ کی طرف اشارہ کرتے ہوئے طنزیہ انداز اختیار کیا۔ مجوزہ قانون سازی کے بارے میں وضاحت نہ ہونے پر سوال اٹھاتے ہوئے انہوں نے کہا کہ 17اپریل 2026 کو سابقہ بل مسترد کیے جانے کے بعد کسی کو بھی یہ معلوم نہیں ہے کہ نئے بل میں کیا تجاویز شامل ہوں گی۔ انہوں نے الزام لگایا کہ حکومت نے اس معاملہ پر سیاسی جماعتوں کے ساتھ سنجیدہ اور منظم بات چیت شروع نہیں کی ہے ۔ یہاں تک کہ کانگریس صدر ملکارجن کھڑگے کی جانب سے وزیر اعظم کو چار خطوط لکھے جانے کے باوجود حکومت نے کل جماعتی اجلاس بھی طلب نہیں کیا۔ جے رام رمیش نے کہا کہ حلقہ بندی ایک وسیع آئینی اور سیاسی عمل ہے ، جو پارلیمنٹ میں نمائندگی کے موجودہ ڈھانچے کو بنیادی طور پر تبدیل کرسکتا ہے۔ اس لیے اس معاملہ میں جلد بازی کے بجائے وسیع پیمانے پر مشاورت اور تمام سیاسی جماعتوں کے درمیان اتفاق رائے پیدا کرنا ضروری ہے ۔ ان کے مطابق، غیر یقینی صورت حال کے درمیان قانون کو زبردستی منظور کرانے کی کوشش مناسب نہیں ہے ۔