نئی دہلی: دہلی کی ایک عدالت نے ہفتہ کو مبینہ ایکسائز پالیسی گھوٹالہ سے متعلق منی لانڈرنگ کیس میں عام آدمی پارٹی (عآپ) کے رہنما منیش سسوڈیا کی عدالتی حراست میں 18 اپریل تک توسیع کر دی۔ دہلی کے سابق نائب وزیر اعلیٰ سسوڈیا کو ان کی سابقہ عدالتی حراست ختم ہونے پر راؤس ایونیو کورٹ میں اسپیشل جج کاویری باویجا کے سامنے پیش کیا گیا تھا۔ منگل کو سسوڈیا کی درخواست ضمانت پر بحث کے دوران ان کے وکیل نے کیس کی تحقیقات مکمل کرنے میں تاخیر کا الزام لگایا تھا۔سسوڈیا کے وکیل موہت ماتھر نے دلیل دی تھی کہ تحقیقات مکمل ہونے کے 11 ماہ گزر جانے کے باوجود ان کے مؤکل کو مبینہ رشوت کی رقم سے جوڑنے کا کوئی ثبوت نہیں ملا ہے۔ ماتھر نے راؤس ایونیو کورٹ کی خصوصی جج کاویری باویجا کے سامنے دلائل پیش کیے، جس میں انہوں نے سی بی آئی حکومت کے وکیل کی غیر حاضری کا مسئلہ اٹھایا۔
