نئی دہلی، 16 ستمبر (یواین آئی) سپریم کورٹ نے منی پور تشدد کیس میں بین الاقوامی سازش کے الزام میں گرفتار موئرنگتھم آنند سنگھ کی عرضی پر قومی جانچ ایجنسی (این آئی اے ) کو نوٹس جاری کیا ہے ۔ جسٹس وکرم ناتھ اور جسٹس سندیپ مہتا کی بنچ نے متعلقہ کیس کی حیثیت جاننے کے لیے این آئی اے سے جواب طلب کیا ہے ۔ بنچ کی طرف سے پیر کو جاری کردہ حکم میں کہا گیا ہے کہ ‘صرف مقدمے کی حیثیت جاننے کے لیے نوٹس جاری کریں’۔ سماعت کے دوران درخواست گزار کی جانب سے پیش ہونے والے وکیل نے دلائل دیتے ہوئے کہا کہ چارج شیٹ داخل ہونے کے باوجود کیس آگے نہیں بڑھا ہے ۔ درخواست گزار گزشتہ دو سال سے جیل میں ہے ۔ انہوں نے یہ بھی دلیل دی کہ شریک ملزم کو ضمانت مل گئی ہے ، لیکن عدالت نے اس بنیاد پر اتفاق نہیں کیا۔ درخواست گزار پر الزام ہے کہ اس نے میانمار میں مقیم دہشت گرد تنظیموں کے ذریعہ منی پور میں نسلی تشدد کا فائدہ اٹھا کر حکومت ہند کے خلاف ’’جنگ چھیڑنے ‘‘ کی سازش کی تھی۔
