حادثہ پر اظہار افسوس‘ ہر مہلوک مسافر کے ورثا کو ایک ہزار امریکی ڈالر معاوضہ دینے کشتی کا مالک راضی
نئی دہلی ۔12؍جولائی ( ایجنسیز )ویتنام کے صدر اور وزیر اعظم نے کشتی حادثہ کے بعد الگ الگ تعزیتی پیغامات بھیجتے ہوئے ہندوستانی عوام اور جاں بحق ہونے والوں کے اہل خانہ سے دلی ہمدردی اور تعزیت کا اظہار کیا۔ انہوں نے صدر جمہوریہ دروپدی مرمو اور وزیر اعظم نریندر مودی سے گہرے دکھ اور افسوس کا اظہار کیا ہے۔ مقامی وقت کے مطابق ہفتے کو این گیانگ صوبے کے ساحل کے قریب خراب سمندری حالات کے دوران ایک سیاحتی تیز رفتار کشتی الٹ گئی۔ کشتی میں 32 ہندوستانی سیاح، ایک ویتنامی سیاحتی رہنما اور عملے کے تین ارکان سوار تھے۔ اس حادثے میں 15 ہندوستانی جان کی بازی ہار گئے جبکہ متعدد افراد زخمی ہوئے۔ انیس افراد کو بحفاظت بچا لیا گیا جبکہ دو ہندوستانی شہریوں کی حالت تشویشناک ہے اور انہیں انتہائی نگہداشت میں علاج فراہم کیا جا رہا ہے۔ویتنام نیوز کے مطابق صدر تو لام اور وزیر اعظم لے منہ ہنگ نے مشترکہ طور پر ہندوستانکی صدر اور وزیر اعظم مودی کو الگ الگ تعزیتی پیغامات ارسال کیے۔ اپنے پیغامات میں ویتنامی رہنماؤں نے کہا کہ متعلقہ ادارے فوری طور پر تلاش اور امدادی کارروائیاں انجام دے رہے ہیں۔زخمیوں کو طبی سہولتیں فراہم کی جا رہی ہیں۔ متاثرہ خاندانوں کی مدد کی جا رہی ہے اور حادثے کے بعد کی تمام صورتحال سے نمٹنے کیلئے ہندوستانی حکام کے ساتھ مسلسل رابطہ رکھا جا رہا ہے۔ویتنامی رہنماؤں نے بتایا کہ متعلقہ ایجنسیوں نے حادثے کی اصل وجہ معلوم کرنے کیلئے باضابطہ تحقیقات شروع کر دی ہیں۔ اسی روز ویتنام کے وزیر خارجہ لے ہوئی ترونگ نے بھی وزیر خارجہ ڈاکٹر ایس جے شنکر کو تعزیتی پیغام بھیجا اور اس سانحے پر گہرے رنج و غم کا اظہار کیا۔مقامی میڈیا کے مطابق فو کووک خصوصی علاقے کی عوامی کمیٹی کے چیئرمین تران منہ خوا نے بتایا کہ سیاحتی کشتی کے مالک نے ہر جاں بحق مسافر کے اہل خانہ کو ایک ہزار امریکی ڈالر اور ہر زخمی مسافر کو پانچ سو امریکی ڈالر بطور معاوضہ دینے پر رضامندی ظاہر کی ہے۔انہوں نے مزید کہا کہ این گیانگ صوبے اور فو کووک خصوصی علاقے کی انتظامیہ بھی حادثے میں جان گنوانے والے ہر فرد کے اہل خانہ کو چھبیس ملین ویتنامی ڈونگ، جو تقریباً ایک ہزار امریکی ڈالر کے برابر ہے، بطور مالی امداد فراہم کرے گی۔ اس کے علاوہ حکومتی ضابطوں کے مطابق دیگر امدادی سہولتیں بھی دی جائیں گی۔تران منہ خوا کے مطابق پولیس، طبی عملہ اور دیگر متعلقہ ادارے تحقیقات مکمل کرنے، متاثرین کی شناخت کی تصدیق کرنے اور تمام قانونی و انتظامی کارروائیاں جلد از جلد مکمل کرنے میں مصروف ہیں۔انہوں نے کہا کہ حکام سفارتی نمائندوں اور متاثرہ خاندانوں کے ساتھ قریبی تعاون کے ذریعے ضروری کارروائیاں مکمل کر رہے ہیں تاکہ جاں بحق افراد کی میتیں بھارت واپس بھیجی جا سکیں یا پھر ان کے اہل خانہ کی خواہش کے مطابق دیگر انتظامات کیے جا سکیں۔