اسلام آباد : وزیر دفاع خواجہ آصف نے کہا ہے کہ ہندوستانی وزیر دفاع راج ناتھ سنگھ الیکشن مہم کی وجہ سے بڑھکیں مار رہے ہیں۔ اپنے ایک بیان میں خواجہ آصف نے کہا کہ الیکشن کے چکر میں بھارت ایسی حرکت نہ کر بیٹھے جس کا اسے خمیازہ بھگتنا پڑے۔ وزیر دفاع خواجہ آصف نے بھارت کو بیان بازی میں محتاط رہنے کا مشورہ دیتے ہوئے کہا کہ چند سال قبل بھارت نے پاکستان میں گھس کر کارروائی کی تو انجام کیا ہوا؟ ہم نے بھارت کا جہاز گرایا تھا اور پائلٹ کو پکڑ کر خیرات میں واپس کیا تھا۔ انہوں نے کہا کہ دوبارہ ایسی کوشش کی تو وہی جواب دیں گے جو پہلے دیا تھا۔ وزیر دفاع خواجہ آصف نے مزید کہا کہ ہندوستان پڑوسی ممالک کے ذریعہ پاکستان میں دہشت گردوں کی سرپرستی کرتا ہے، ہندوستان میں اتنی جرات نہیں کہ براہ راست حملہ کرے۔
