خواتین نمائندوں کو اجتماعی قیادت اور اختراعی صلاحیتوں کا استعمال کرنے اسپیکر لوک سبھا کا مشورہ
نئی دہلی؍ ٹونک۔ 21 نومبر (یو این آئی)لوک سبھا اسپیکر اوم برلا نے آج برکس ممالک کی خواتین نمائندوں کو مشورہ دیا کہ وہ عالمی چیلنجوں سے نمٹنے اور ایک زیادہ پرامن، مستحکم اور خوشحال دنیا کی تعمیر کے لیے اپنی اجتماعی قیادت، تجربات اور اختراعی صلاحیتوں کا استعمال کریں۔ راجستھان کے ٹونک میں واقع ونستھلی ودیا پیٹھ میں منعقدہ برکس خواتین کی قیادت سے متعلق سربراہی اجلاس کی افتتاحی تقریب سے مہمان خصوصی کی حیثیت سے خطاب کرتے ہوئے انہوں نے کہا کہ خواتین کا اعتماد، مثبت نقطہ نظر اور اختراعی صلاحیت قوموں اور انسانیت کو درپیش پیچیدہ مسائل کے حل کے نئے راستے کھول سکتی ہے ۔ برکس ممالک کے درمیان تعاون کی اہمیت پر زور دیتے ہوئے مسٹر برلا نے کہا کہ جغرافیائی، اقتصادی اور سیاسی حالات میں اختلافات کے باوجود تمام ممالک کئی مشترکہ چیلنجوں کا سامنا کر رہے ہیں، جن سے نمٹنے کے لیے اجتماعی کوششیں ضروری ہیں۔ انہوں نے زور دے کر کہا کہ اقتصادی اور سماجی ترقی کے لیے عالمی امن اور استحکام ناگزیر شرائط ہیں اور کسی ایک ملک میں پیدا ہونے والی بدامنی کے دور رس اثرات پوری دنیا پر پڑ سکتے ہیں۔ انہوں نے کہا کہ برکس بات چیت، تعاون اور خیالات و بہترین طریقہ کار کے تبادلے کے لیے ایک اہم پلیٹ فارم فراہم کرتا ہے ، جس سے ممالک کو مشترکہ مفادات اور اتفاق رائے پر مبنی حل کی سمت کام کرنے میں مدد ملتی ہے ۔ ٹیکنالوجی، خصوصاً مصنوعی ذہانت (اے آئی) کی انقلابی صلاحیتوں کا ذکر کرتے ہوئے لوک سبھا اسپیکر نے صحت، تعلیم، زراعت، دفاع، سائبر سکیورٹی اور خواتین کی صنعت کاری جیسے شعبوں میں اس کے ذمہ دارانہ استعمال کی اپیل کی۔ انہوں نے اس بات پر زور دیا کہ تکنیکی ترقی کی رہنمائی انسان مرکوز نقطہ نظر، اخلاقی اقدار، ہمدردی اور جواب دہی سے ہونی چاہیے ۔ انہوں نے کہا کہ یہ ہم سب کی مشترکہ ذمہ داری ہے کہ مصنوعی ذہانت انسانیت کی خدمت کرے اور عام شہریوں کی زندگیوں کو زیادہ محفوظ اور بہتر بنائے ۔ برلا نے موسمیاتی تبدیلی، دہشت گردی، سائبر جرائم اور منشیات کی اسمگلنگ جیسے خطرات سے نمٹنے کے لیے باہمی تعاون کو مزید مضبوط بنانے کی ضرورت پر بھی زور دیا۔ انہوں نے کہا کہ مختلف ممالک کے درمیان اختراعات، تجربات اور کامیاب طریقہ کار کے تبادلے سے نئے نقطہ نظر سامنے آ سکتے ہیں اور برکس ممالک ابھرتے ہوئے عالمی مسائل کا زیادہ مؤثر انداز میں حل تلاش کر سکتے ہیں۔